O Teatro Rosalía Castro da Coruña acolle o novo espectáculo de Mercedes Peón

Mercedes Peón

O director do Teatro Rosalía Castro, Xosé Paulo Rodríguez, acompañado por Mercedes Peón, presentou esta mañá S.O.S., o último traballo da artista que albergará o recinto o vindeiro sábado, 15 de febreiro, ás 20.30 horas. O disco, o cuarto da súa carreira tras Isué, Ajrú e Sihá, foi elixido como o quinto mellor disco do mundo da World Music Charts Europe.

O traballo, que inclúe os temas máis recorrentes na discografía de Peón, como o feminismo ou a desigualdade social, involucra ao espectador a través dun espectáculo no que se conta coa participación do público. Ademais, personalízase a cada lugar que o acolla, adaptándose a cada contexto e converténdose nun espectáculo único e especial.

O prezo das entradas para ver esta obra oscila entre os 7 e os 15 euros, con descontos do 20% para os titulares do carné novo, para os maiores de 65 anos e para as persoas desempregadas. Xa se poden adquirir en Servinova, no teléfono 902 504 500; na Praza de Ourense, en horario de 9.30 a 13.00 horas e de 16.30 a 19.30 horas; e, os días de función, no despacho de billetes do propio Teatro Rosalía, de 12.00 a 14.00 e de 18.00 a 20.00 horas.

Mercedes Peón é unha das artistas galegas máis destacadas do panorama actual e recibiu infinidade de recoñecementos tanto a nivel nacional como internacional como o Premio Artista do Ano, concedido pola revista Folkworld; o Premio á Galega do Ano; ou o Premio Nacional de Música que outorga a Xunta de Galicia.