O rexedor compostelán non ve “afortunada” a conversación do edil que pediu un despedimento a Vendex

O alcalde de Santiago, Ángel Currás, asegurou este mércores que a conversación que recolle o sumario da Operación Pokémon entre o edil Adrián Varela e un responsable de Vendex, na que o concelleiro lle reclama o despedimento da muller dun sindicalista, “non é afortunada”, aínda que instou a ser “prudentes” nas decisións ata que se coñeza “a totalidade” das actuacións.

A preguntas dos medios, o rexedor compostelano asegurou que “nestes momentos” o levantamento do segredo sumarial “é moi parcial” e “limítase a unha parte mínima”, polo que rexeitou expresar a súa opinión ou aventurar responsabilidades políticas ata que teña “coñecemento de todo o sumario”.

Na parte alzada, recordou, non aparecen “as declaracións do concelleiro” que mantivo esta conversación, polo que rexeitou “valorar” o seu comportamento.

“Non me parece afortunada esa conversación, pero calquera persoa ten dereito á presunción de inocencia”, sentenciou Ángel Currás, quen apuntou que Adrián Varela “recoñeceu que se equivocara”. En todo caso, garantiu que a petición deste despedimento “non era unha cuestión do goberno” local.

Sobre a pretensión do sindicato CIG de levar adiante unha demanda penal por un delito contra a liberdade sindical, Currás recordou que a central sindical “é libre” de emprender estas actuacións “se considera que se danou o dereito do traballador”, aínda que apelou á “prudencia” e á “presunción de inocencia”.