O Plan de Mobilidade Urbana Sustentable impulsa o cartón Millennium Plus e a tarifa plana para o bus urbano

O alcalde da Coruña, Carlos Negreira, presentou esta tarde, no centro sociocultural da Ágora, o primeiro Plan de Mobilidade Urbana Sustentable (PMUS), un proxecto pioneiro que suporá un punto de inflexión, ao “pasar da cidade dos vehículos á cidade das persoas”. Carlos Negreira destacou a todos os colectivos sociais e cidadáns invitados ao acto que o proxecto inclúe 68 accións, das que a metade se desenvolverá a curto prazo, e entre as que destacan a implantación do cartón Millennium Plus -achegará maior eficiencia e seguridade con respecto ao dispositivo actual-, a tarifa plana para o bus urbano e a mellora da conexión cos polígonos industriais e os hospitais.

“Hoxe atopámonos ante unha oportunidade única para a nosa cidade. Temos por diante unha década crave. Apostamos por unha cidade moderna, sustentable, amable e comprometida cos cidadáns. Entre todos tomamos medidas e tratamos de recuperar os espazos públicos para as persoas. Nós apostamos polas persoas”, afirmou o alcalde durante a presentación do PMUS, na que tamén interveu a concelleira de Mobilidade, Begoña Freire.

Carlos Negreira explicou que o Plan de Mobilidade tradúcese en dar prioridade e máis protagonismo aos peóns, as bicicletas e o transporte público, un modelo que permite “pasar da cidade dos coches á cidade das persoas”. O alcalde subliñou que o Goberno local demostra co PMUS o seu compromiso coa mobilidade a través de 68 medidas estratéxicas a desenvolver en 10 anos; a través de 10 eixos sectoriais e dun plan de seguimento para o seu cumprimento; e a través dun investimento de 20 millóns de euros para a súa execución.

A metade das medidas desenvolverase a curto prazo, nun máximo de dous anos, entre as que Carlos Negreira destacou tres propostas que -baixo as premisas de aplicar o sentido común e de adaptarse ás necesidades reais da cidade e das demandas que expoñen os propios cidadáns- contribuirán a converter A Coruña nunha cidade máis sustentable desde o punto de vista da mobilidade:

Cartón Millennium Plus. O Concello porá en marcha un modelo máis fiable e avanzado a nivel tecnolóxico para dar solución aos problemas e erros que xera o actual cartón. Neste sentido, tamén se está traballando coa Xunta para que o novo cartón Millennium Plus sexa compatible co transporte metropolitano.
 
Tarifa plana para buses urbanos. O Concello premiará aos usuarios que máis utilicen o transporte público. A tarifa plana estará lista para a súa posta en marcha en 2015. Este novo sistema de bonificación premiará ás persoas que aposten polo transporte público para incrementar de maneira significativa o número de usuarios.
 
Mellorar a conexión cos hospitais e cos polígonos industriais como unha das medidas para potenciar a rede actual de buses urbanos. Será o paso previo á implantación dun sistema de calidade integral do transporte público urbano, é dicir, coñecer a opinión e demanda de viaxeiros e posibles usuarios antes de estudar a reordenación do mapa de liñas de bus urbano.
 

Durante a súa intervención, o alcalde reiterou o espírito do Goberno local de impulsar a participación no Plan de Mobilidade Urbana Sustentable, unha colaboración cidadá que se traduciu nos últimos meses en máis de 150 reunións con colectivos, en máis de 3.000 consultas directas nos barrios e chegouse a máis de 30.000 persoas a través da web e das redes sociais para recoller as súas opinións e achegas. Pola súa banda, a concelleira de Mobilidade anunciou que o próximo 15 de marzo tamén se organizará unha xornada divulgativa do PMUS. Trátase dun plan de mobilidade que vai máis aló da cidade, que ten vocación metropolitana para dar solucións ás conexións da cidade coa comarca, pois actualmente case o 89% dos desprazamentos interurbanos realízanse en vehículo privado.

O PMUS responde a unha filosofía de traballo do actual equipo de goberno e permite que a cidade se axuste á Lei de Economía Sustentable. Así, tendo en conta a seguridade viaria e fomentando a participación durante a súa elaboración e posterior posta en funcionamento, o Plan de Mobilidade recolle un diagnóstico exhaustivo, obxectivos a cumprir, medidas a implantar, os mecanismos de financiamento para que se poida desenvolver, procedementos que permitan establecer indicadores de seguimento e de evolución do PMUS, e unha análise de custos e beneficios.

O primeiro Plan de Mobilidade Urbana Sustentable da cidade ten un horizonte temporal de execución de 10 anos, coa participación como eixo vertebrador e cun diagnóstico que corresponde á situación actual da mobilidade e ás medidas que se teñen que adoptar para a súa mellora a través do PMUS. Fronte a unha cidade que carecía dunha estratexia de mobilidade, o alcalde explicou que o PMUS é un documento vivo -capaz de adaptarse ás achegas cidadás nos distintos escenarios que se expoñan- onde impera o sentido común, con medidas realistas e viables, e a concienciación cidadá para lograr unha mobilidade máis sustentable.

O Plan de Mobilidade Urbana Sustentable establece 10 eixos sectoriais e un plan de seguimento para comprobar que as 68 medidas desenvolvidas no documento aplícanse e son efectivas. Os eixos sectoriais incluídos no PMUS son os seguintes:

Jerarquización viaria. Permite contar cunha estratexia de mobilidade, é dicir, redistribuír a estrutura do tráfico en función da realidade das rúas. A partir desta jerarquización viaria pódense desenvolver o resto de eixos sectoriais.
 
Mobilidade peonil. Converter ao peón no gran protagonismo e dispor dunha cidade máis accesible para os viandantes. Na actualidade, o 47,5% dos desprazamentos dentro da cidade realízanse a pé. De non aplicarse o PMUS, en dez anos a porcentaxe estaría por baixo do 44%; mentres que coa posta en marcha do Plan de Mobilidade a previsión é superar o 50%.
 
Mobilidade ciclista. Proponse implantar unha malla ciclista que, unida ás campañas de concienciación para respectar aos ciclistas, permita unha mellor convivencia nos distintos medios de transporte.
 
Transporte público urbano. Mellorar a calidade do servizo actual e as conexións cos barrios para que se converta nunha auténtica alternativa ao vehículo privado.
 
Estacionamento. Ofrecer solucións para corrixir malos hábitos como a dobre fila, cunha mellor xestión das prazas de aparcadoiro e cunha menor dependencia do vehículo privado. Cada día os vehículos percorren pola cidade e a súa contorna 3,2 millóns de quilómetros.
 
Seguridade viaria. Promover melloras en materia de infraestruturas, sinalización e concienciación. Para conseguilo, o Concello contará co Plan Local de Seguridade Viaria e o Observatorio da Seguridade Viaria.
 
Distribución de mercadorías. Mellorar a xestión e control das zonas de carga e descarga, o que repercutirá nunha mellora dos espazos públicos e nun mellor funcionamento do transporte peonil e rodado.
 
Cidade de baixas emisións. O obxectivo é reducir o número de vehículos que se desprazan pola Coruña, o que implicará unha diminución do ruído e da contaminación.
 
Xestión da mobilidade. Aplicación das novas tecnoloxías para unha xestión máis eficiente. Entre as medidas, disporase de paneis de sinalización e información para dar fluidez ao tráfico, e promóvese o uso do coche compartido e o plan de transporte a polígonos industriais.
 
Difusión do PMUS. Desenvolver campañas de concienciación para cambiar os hábitos e tendencias. O tráfico está relacionado co 80% do ruído que se xera na cidade.