O incendio dunha nave de materiais de construción mobiliza ós servizos de emerxencias

Actuación dos bombeiros

Os equipos de emerxencias de Vilagarcía sufocaron esta mañá un pequeno incendio na nave de Baygar, en Rubiáns. A rápida intervención dos traballadores da empresa e de protección civil e bombeiros fixo que non houbera que lamentar danos de importancia.

A voz de alarma dábana os propios traballadores, que foron os primeiros en detectar o fume que saía da nave. Segundo declaracións de Protección Civil, “ó redor das 8 da mañá recibimos unha chamada do 112 alertando dun incendio urbano na zona de Rubiáns e desprazamos unha dotación ó lugar, tamén bombeiros, policía local e nacional”.

Os equipos de emerxencia atopáronse cun incendio no cadro eléctrico da nave, do que aínda se descoñecen as causas. A pesares do susto, puideron extinguilo sen problemas nun prazo de “ó redor de media hora, a pesares de que os traballadores que o detectaran xa comezaran a extinción cos medios que contan” A extinción foi moi rápida, segundo Protección Civil “dada a inmediatez coa que se chegou ó lugar”.

As lapas afectaron unicamente a unha pequena parte da nave, onde estaba ubicado o cadro eléctrico. Non houbo que lamentar danos persoais.