O Igape ofrece os seus servizos e apoios a empresas e emprendedores no salón Franquiatlántico

A Consellería de Economía e Industria, a través do Igape, informará sobre os apoios e servizos que pon a disposición de emprendedores e empresas no salón Franquiatlántico, que se celebra mañá e o sábado na Terminal de Cruceiros de Vigo.

Ademais de participar na mesa redonda inaugural centrada nos retos de emprender en franquía que se desenvolverá a partir das 11 horas de mañá, o Instituto disporá dun espazo expositivo propio destinado a achegar aos visitantes información e asesoramento sobre os servizos e instrumentos de apoio habilitados pola Consellería de Economía e Industria para a posta en marcha ou o desenvolvemento de novas empresas, facilitar a mellora da competitividade ou impulsar a internacionalización das pemes galegas.

A través do Igape, a Consellería de Economía e Industria ofrece un amplo e completo abano de servizos e instrumentos para asesorar e acompañar aos novos emprendedores, autónomos e empresarios que comezan, desde as fases previas de elaboración e avaliación económica e financeira dun plan de empresa ata as fases de desenvolvemento e consolidación de proxectos empresariais.

Nestes momentos, o Igape mantén activados programas de axudas como Galicia Inviste, para apoiar proxectos de grandes investimentos, con orzamentos a partir de 200.000 euros, ou Galicia Emprende, para proxectos de emprendedores ou novas empresas, con orzamentos a partir de 35.000 euros, con apoios de ata o 50% para investimentos de emprendedores, autónomos ou pemes de ata un ano de actividade.