O consorcio As Mariñas obtén unha Mención especial nos premios Coopera

O Consorcio As Mariñas volve resultar galardoado polas súas ideas innovadoras sobre o tratamento de residuos. A Xunta de Galicia acaba de comunicar a concesión dunha mención especial dos premios Coopera Galicia que convoca por unha proxecto piloto para pór en valor os residuos de carácter vexetal que se depositan nos puntos limpos do Consorcio.

O programa piloto presentado polo Consorcio As Mariñas persegue a reutilización destes residuos vexetais, logrando beneficios ambientais e reducindo os custos para o organismo. En concreto, o sistema consistiría na instalación de máquinas trituradoras e compactadoras no punto limpo que reducirían o volume dos residuos vexetais levados alí polos veciños.

Esta compactación provocaría que o punto limpo aumentase a súa capacidade de recepción e que o transporte dos residuos ao xestor autorizado optimizásense, reducindo custos e a contaminación que leva.

Con este sistema ademais propiciarase a recuperación de materia orgánica para a obtención de biomasa de calidade. Trátase dun biocombustible de alta calidade, moi económico e renovable, o que suporía un incremento da riqueza local.

A produción de pellet de madeira está a crecer a nivel mundial. Na comarca, a súa implantación pode crear efectos positivos na loita contra incendios forestais. A alta potencialidade do monte galego fai que o sector da biomasa constitúa unha excelente alternativa para xerar emprego nas zonas rurais.

A mención especial do premio Coopera Galicia non leva ningunha dotación económica, polo que o Consorcio analizará as fórmulas para unha posible realización deste proxecto piloto.

Os premios Coopera Galicia convocados pola Xunta de Galicia están dirixidos a distinguir as iniciativas de fomento do asociacionismo municipal. Na edición pasada, o Consorcio recibiu o primeiro premio por un sistema de sensores nos colectores de vidro e papel que indican o seu nivel de enchido, o que optimiza as rutas de recollida, reducindo gastos e contaminación.

Na actualidade este sistema xa está implantado. Serve ademais para coñecer o nivel de uso desta recollida, propiciando o aumento ou variación da localización de colectores para fomentar a súa utilización.

O presidente do Consorcio As Mariñas, José Antonio Santiso, móstrase “orgulloso” de que o ente volva ser distinguido polo deseño dun proxecto innovador asociado á competencia de tratamento de residuos da área metropolitana. O alcalde abegondés destaca que nos últimos dous anos “déronse pasos para incrementar a reutilización de residuos como o aceite ou os téxtiles”, ademais dos xa existentes de vidro e papel. Este proxecto, en caso de poder levalo a cabo, suporía engadir os restos vexetais, que tanto se xeran na comarca, á lista.

O Consorcio recibirá a mención especial nun acto que terá lugar o mércores, 5 de febreiro, na Cidade da Cultura.