O Concello de Santiago non “esta preocupado” polos expedientes pedidos

O primeiro tenente de alcalde e concelleira de Economía do Concello de Santiago, Reyes Leis, asegurou que se “cargou” no portal de urbanismo municipal “a información relativa aos expedientes que pediu a xuíza”, nun “exercicio de transparencia” e para mostrar que “todo está correcto e non hai ningún motivo para estar preocupado” por iso.

Así o dixo en rolda de prensa, tras unha xunta de voceiros convocada ás 11,30 horas –á que Leis non acudiu, pero exerceu despois de voceiro, ao estar ausente María Pardo–. Nesa reunión, dixo, deuse á oposición a documentación respecto ao que requiriu a xuíza. Ademais, cargouse no portal de urbanismo toda a información relativa a estes expedientes que pediu a xuíza”.

Falta unicamente, afirmou, un contrato sobre a construción dunha rotonda, posto que “ese servizo non se solicitou” e, polo tanto, non hai documentos. Leis apostou por “dar información puntual” segundo a vaia tendo o Concello e por facilitar a que pida á xustiza.

Respecto a esta investigación, a edila indicou que este mércores non houbo “novidade” e que solo onte se requiriu documentación por parte da xuíza María del Carmen García Campos. A información que se pediu foi entregada, agregou, e está “accesible” na web do Concello para que poida ser consultada por quen o desexe e se vexa que “todo se fixo de acordo á lei”.

Ademais, Reyes Leis dixo que o alcalde, Ángel Currás, “non está para nada escondido” e se remitiu ás declaracións da semana pasada, tras levantarse o segredo do sumario sobre unha segunda parte da investigación da ‘Operación Pokémon’. En calquera caso, negou que evite comparecer ante os medios e sinalou que “é un home prudente”.

POKÉMON

Preguntada en concreto por que non houbera convocatorias públicas do concelleiro Adrián Varela tras publicarse algunhas das conversacións mantidas por el e incluídas na ‘Pokémon’ –nalgunha das cales pide que se despida unha muller pola actividade sindical do seu marido–. “Non sei se hai motivo para iso ou coincidiu así a actividade”, replicou Leis.

A concelleira considerou que non hai que dar “maiores explicacións” por algúns dos contidos dese sumario no que se refire a “relacións persoais”.

“Todos temos no traballo mellor ou peor relación cos compañeiros”, apuntou e considerou que algúns aspectos “non deberían estar en boca de todo o mundo” e o levantamento do segredo tería que ter en conta tamén o respecto “á vida privada”. A edila dixo que o que desexa facer o equipo de goberno é “seguir traballando”.