O BOP e o DOG publican a licitación do desdobramento da avenida de Vigo en Pontevedra

O Diario Oficial de Galicia e o Boletín da Provincia de Pontevedra publican hoxe a licitación do proxecto de urbanización da rede arterial do novo acceso sur N-550 (desdobramento da avenida de Vigo). Segundo anunciara o concelleiro de obras, Luís Bará e tal e como recollen os anuncios, trátase de completar a rede arterial definida no PXOU, dotándoa de todos os servizos e a reordenación da rúa. O prazo de execución é de 10 meses.

O orzamento de licitación é de 4.156.055,00 euros, no que está incluído a construcción do novo viario así como todas as melloras do proxecto como a reurbanización da avenida da Estación ou a permeabilización do novo viario coa avenida de Vigo, así como a reforma da rotonda de Fernández Ladreda ou a reurbanización da avenida de Vigo (total ou parcialmente).