Novas edicións do programa Posto a Posto e do taller formativo do cemiterio de San Amaro

O Concello da Coruña segue adiante cos seus programas de formación e inserción laboral, con especial atención ás persoas desempregadas. Así, a Xunta de Goberno Local desta semana deu o visto e prace a dous das iniciativas estratéxicas da Concellaría de Emprego e Empresa, como son o programa Posto a Posto e o taller que se desenvolve no cemiterio de San Amaro. Cun investimento final entre ambos os proxectos que pode alcanzar os 590.000 euros e coa colaboración da Xunta, o departamento municipal que dirixe Luisa Cid busca favorecer o acceso ao mercado laboral de 155 persoas.

SAN AMARO

A Xunta de Goberno Local, a proposta da Concellaría de Emprego e Empresa, aprobou solicitar á Consellería de Traballo e Benestar a súa colaboración para desenvolver a segunda fase do taller de emprego do cemiterio de San Amaro, orzado en preto de 350.000 euros e que permitirá a contratación de
35 persoas desempregadas, durante 6 meses, a partir do 1 de setembro.

O taller de emprego San Amaro II contribuirá a desenvolver o Plan Director do Cemiterio de San Amaro, un programa estratéxico que permite establecer políticas que favorecen o equilibrio adecuado entre a conservación e uso e a planificación das intervencións de conservación e promoción deste camposanto municipal, recoñecido como cemiterio de singular interese ao estar incluído dentro dos 150 camposantos da Asociación de Cemiterios Significativos de Europa (ASCE).

O novo taller municipal do departamento que dirixe Luisa Cid diríxese a persoas desempregadas. En total, contrataranse 35 persoas, que estarán dirixidas por persoal técnico. O taller, cun prazo de duración de 6 meses, empezará en setembro deste ano. Na proposta aprobada na Xunta de Goberno, solicítase unha subvención á Consellería de Traballo por importe de 309.584,10 euros, aos que se suman os 40.000 euros que ten comprometido o Concello a través dos orzamentos de 2014 e 2015.

O obxectivo deste taller é ofrecer unha formación específica aos alumnos para facilitar a súa inserción no mercado laboral:

– Instalación e mantemento de xardíns e zonas verdes. Estas tarefas desenvolveranse nos xardíns de entrada ao cemiterio e a zona axardinada do camposanto civil. O obxectivo é mellorar e cubrir as necesidades relativas ao estudo das especies arbóreas, mellora da terra e do conxunto da vexetación, instalación de rega ou drenaxes.

– Pavimento e albanelaría de urbanización. Os alumnos colocarán chapa sobre a mampostería de pedra de granito, reformulo e limpeza no camiño central dos departamentos 1 e 4 e nos muretes do departamento 4.

– Pintura industrial en construción. Consiste en limpezas con auga a presión e cepillos das zonas metálicas a pintar, para posteriormente proceder ao pintado das portas do acceso principal e do cemiterio civil, e das varandas das escaleiras de acceso, ademais de limpar e pintar os nichos do cemiterio civil e dos departamentos 1, 2 e 3.

POSTO A POSTO

A Xunta de Goberno celebrada onte tamén acordou solicitar unha segunda subvención á Xunta para un plan formativo da Concellaría de Emprego e Empresa. Neste caso, trátase do programa Posto a Posto 2014-2015. Desta nova iniciativa municipal beneficiaranse un total de 120 persoas menores de 30 anos, con especial atención a desempregados ou perceptores de prestacións ou subsidios por carecer de traballo. Cun investimento de 240.000 euros -dos que a Consellería de Traballo e Benestar achegaría 186.497,40 euros, e o Goberno local, os 53.502,60 euros restantes-, o proxecto ten un prazo de execución de
12 meses, co obxectivo de polo en marcha en outubro deste ano.

O programa Posto a Posto ten como principal obxectivo a creación dunha estrutura de asesoramento no proceso de procura de emprego para mellorar a inserción laboral de persoas desempregadas a través de itinerarios individualizados nos que ademais se teñan en conta as medidas de conciliación familiar.

A Concellaría de Emprego e Empresa aposta sobre todo a través deste programa por fomentar o carácter emprendedor dos mozos, así como pór ao seu alcance un sistema de formación técnica e práctica á carta. Os itinerarios personalizados de inserción laboral inclúen, entre outras modalidades, módulos de orientación motivacional e curso de iniciación dixital para buscar emprego, informática avanzada, ou clases de preparación para as probas libres da ESO. Ademais, prevese que esta formación específica de cada alumno leve prácticas en empresas cun máximo de 120 horas por acción.

O Concello, en colaboración coa Xunta, ten en marcha o programa Posto a Posto 2013-2014 desde o pasado mes de outubro, ofertando cursos de longa duración que están deseñados en función dos nichos de empleabilidad e das propias características dos desempregados. Esta metodoloxía permitiu alcanzar bos resultados en programas anteriores.

No Posto a Posto 2012-2013, producíronse un total de 65 insercións laborais, é dicir, o 54% dos alumnos saíron cun posto de traballo. Destas 65 insercións, 29 producíronse nos sectores do comercio e hostalaría, aínda que tamén houbo contratacións no campo sociosanitario, da limpeza e a construción. Así mesmo, seis dos alumnos que se integraron no mercado laboral fixérono grazas ao autoemprego, abrindo negocios de hostalaría, lecer ou tempo libre (un parque infantil), estética e comercio (unha mercería, unha tenda de decoración e outra de electrodomésticos).