Monforte acollerá a entrega de premios do II Circuito Leader Ribeira Sacra de Carreiras Populares 2013.

Este venres 14 de febreiro ás 20:00 h na Casa de Cultura de Monforte de Lemos, Luisa González Somoza (Bóveda) e José Manuel Teijeiro Vila (Club Atletismo Monumental de Lugo) recibiran os trofeos que os acreditan como gañadores absolutos do II Circuito Leader Ribeira Sacra de Carreiras Populares 2013.

Neste acto tamén se fará entrega dos premios que corresponden aos gañadores das sete categorías establecidas, así como o agasallo conmemorativo a todos aqueles corredores que participaron como mínimo en seis das oito probas celebradas.

Os diferentes premios serán entregados polos membros da Xunta Directiva do GDR Ribeira Sacra.

Esta novidosa iniciativa posta en marcha polo GDR Ribeira Sacra estase a consolidar no calendario deportivo de carreiras populares de Galicia, como o demostra que nestas dúas edicións xa teñen participado nas probas absolutas 3.560 corredores, dos cales o 76% son de fora do territorio do GDR.