“Marina Coruña” proclámase vencedor das Series de Inverno Acto II

O pasado sábado, o Real Club Náutico da Coruña celebrou a segunda e última xornada das SERIES DE INVERNO – Acto II, para a clase J80.

Loita enconada entre “Marina Coruña”, patroneado por Pablo Martínez e “Biba” patroneado por Miguel Fernández, navegando case en Match Race, con presalidas intensas e marcaxes continuas. Puidéronse completar 4 probas tipo barlovento, cunhas condicións algo complicadas, con vento moi racheado do sur, e mar de fondo do norte. A tripulación que mellor se adaptou a estas condicións foi a do “Marina Coruña”, mostrándose moi regular e finalizando vencedor con 9 puntos (1-3-1-4-1-1-2), por diante do “Biba” con 11 puntos (3-1-3-1-3-2-1), e en terceira posición o “Miúdo” de Carlos López con 21 puntos.

Toma de contacto para o “Moura” de Jacobo Penide que necesita algo de rodaxe para estar ao nivel da flota, pero que sen dúbida en breve conseguirao.