Máis de 500 entradas vendidas para o partido do Celta ante o Atlético de Madrid

Poucos días despois da súa posta a disposición dos afeccionados e a falta de máis dunha semana para o partido, xa se despacharon un bo número de entradas nas oficinas de abonados para o apaixonante encontro do sábado 8 de marzo ante o Atlético de Madrid (Balaídos, 20.00 horas). Os seguidores celestes xa adquiriron máis de 500 billetes para este interesante choque ante un dos grandes equipos da liga.

O club mantén para este esixente partido ante os branquivermellos os prezos habituais co fin de xerar un bo ambiente no estadio e multiplicar o necesario apoio ao equipo ante un complicado rival. Ademais, como agradecemento ao exemplar apoio dos abonados, este partido non foi designado como ‘Día do Club’, polo que esta tempada redúcese a dúas ese tipo de encontros.

Os seguidores  Sub-24 poden comprar billetes por un custo de entre 15 e 25 euros, mentres que para os adultos o prezo oscila entre os 25 e os 50 euros. As entradas poden adquirirse na oficina de abonados de luns a venres en horario de 10 a 14 e de 17 a 20 horas, mentres que o despacho de billetes virtual (www.celtavigo.org/taquillaCelta) permanece operativa as 24 horas do día.