Goleada do Santiago Futsal ao Col. Areas Gran Canaria

Encontro en Canarias. Foto: José María Picón

O Santiago Futsal brindou un 6-0 a Santi Valladares no seu 50 partido como adestrador tras unha primeira parte irregular na que as ocasións dos santiagueses non lograron facerlles sacar vantaxe no marcador. Co segundo gol a metade da segunda parte o equipo desatouse goleando a un conxunto canario que se afunde na última praza. Os santiagueses suman xa 32 puntos e manteñen a sexta praza.

O partido comezou con dominio santiagués que chegaba á portaría rival a través de xogadas de estratexia. Foi precisamente con estratexia como se fixo o primeiro gol aos 8 minutos tras un tanto de David. Os canarios apenas lograban chegar con perigo á portaría de Juanjo, que saía con seguridade da súa portaría para desbaratar as súas posibles ocasións, mentres os santiagueses seguíano tentando, atopándose a un gran Dani Cabezón na portaría canaria.

Tras o tempo de descanso, e cando só corrían dous minutos da continuación do partido, Hamza viu dous cartóns sucesivos, que fixeron que a Col. Areas Gran Canaria gozará das súas mellores ocasións, ambas as de Carlos Alberto, que Juanjo resolveu sen dificultade. Con igualdade de novo no campo, o Santiago Futsal volveu esmagar sobre a portaría de Dani Cabezón e cara ao ecuador da segunda metade, Barroso, que apenas gozou de minutos polas súas molestias na pube, saíu para facer unha gran xogada individual e asistir a David que fixo o segundo. Campoy vestiuse de porteiro-xogador a 11 minutos do final e Diego Quintela aproveitou para bater a Glauber baixo paus para facer o terceiro. Os canarios acumularon faltas e os santiagueses dispuxeron de tres dobres penaltis, marcando Eloy Vermellas os dous últimos e estreándose en liga como goleador. David Pazos puxo o definitivo sexto gol tras un gran pase de Chus, batendo á meta rival e dando 3 puntos máis ao Santiago Futsal.

Sala de prensa            

Ao finalizar o partido, Santi Valladares, adestrador do Santiago Futsal, afirmou que ”foi complicado abrir a lata e unha vez que fixemos o segundo controlamos o partido e eles viñeron un pouco abaixo. Foi clave abrir o partido coa estratexia e sobre todo o traballo de anticipación, e na segunda parte cambiamos unha pauta e o equipo viuse máis cómodo. Ademais estivemos moi ben na defensa do 5 para 4”.

Pola súa banda, Suso Méndez, adestrador dos Colexios Areas Gran Canaria, afirmou ao terminar o partido que “a primeira parte tivemos as nosas ocasións, pero despois do segundo gol fíxonos moito dano e o Santiago Futsal subiuse e a nós agarrounos a clasificación”. 

Ficha do partido

Santiago Futsal: Juanjo, David, Hamza, Hugo e Eloy Vermellas (cinco inicial), Loito, David Pazos, Quintela, Pablo Tallón, Chus e Barroso

Montesinos Jumilla: Dani Cabezón, Lincon, Juanillo, Carlos Alberto e Glauber (cinco inicial), Marc Areny, Xullo, Campoy, Dani Laurino e A. Díaz

Goles: 1-0 David (min 8), 2-0 David (min 29), 3-0 Diego Quintela (min 30), 4-0 Eloy Vermellas (min 32), 5-0 Eloy Vermellas (min 36), 6-0 David Pazos (min 37)

Árbitros: Contreras Tejedor e Pérez Álvarez do colexio castelán-leonés

Amoestacións: Cartón amarelo para Glauber e Marc Areny da Col. Areas Gran Canaria e para Loito, David Pazos do Santiago Futsal. Hamza foi expulsado por dobre cartón amarelo.

Incidencias: Partido correspondente á vixésimo terceira xornada de liga, disputado no Multiusos Fontes do Sar ante máis de 1.000 espectadores.