Ferrol e a UDC organizan unha charla sobre o programa de convivencia interxeracional “Comparte”

O Concello de Ferrol, a través da Concellería de Benestar Social, e a Universidade da Coruña (UDC), organizan mañá unha nova charla informativa sobre o programa de convivencia interxeracional “Comparte”. Esta proposta, posta en marcha pola Administración ferrolá e o organismo universitario e pioneira en Galicia, pretende dar resposta tanto as necesidades de compañía e apoio das persoas maiores, como ás necesidades de aloxamento dos estudantes universitarios.

A charla informativa para dar a coñecer este programa de aloxamento interxeracional terá lugar mañá, mércores día 5, ás 12:00 horas no Centro Sociocomunitario da Consellería de Traballo e Benestar, situado na rúa Real nº1. Esta conferencia estará orientada principalmente aos usuarios de dito centro e será impartida por técnicos municipais e da UDC. O programa “Comparte” está dirixido as persoas xubiladas maiores de 60 anos e menores de 85 que vivan soas e sexan autónomas por si mesmas; e aos estudantes universitarios matriculados nunha titulación do campus de Ferrol tanto nun grao, mestrado ou doutoramento maiores de 18 anos e menores de 35 que non sexan residentes no municipio ferrolán.