Enxuto confirmou os prognósticos e proclamouse vencedor absoluto do IV Trofeo Porto de Marín

Sensacional fin de regata o que tivo lugar este pasado sábado na Ría de Pontevedra coa consecución da segunda e definitiva etapa do IV TROFEO PORTO DE MARÍN de Cruceiros que organizou brillantemente o  Real Club de Mar de Aguete co patrocinio da Autoridade Portuaria de Marín e Ría de Pontevedra e a colaboración da Deputación de Pontevedra e Concello de Marín.

A mañá presentouse moi dura de vento e mar, co cal o Comité de Regata, unha vez estudados os distintos mapas meteorolóxicos, aprazou a saída soamente 30 minutos facendo caso á previsión que anunciaba unha melloría a partir das 2 da tarde, acertando de pleno. Percorrido dunhas 8 millas fronte ao club cun desmarque e a continuación tres tramos entre a illa de Tambo e a baliza dos Pelados, facendo que a proba resultase moi esixente, con moitos altos e baixos de vento, moitos roles e consecuentemente moitas alternativas, de forma que as clasificacións da primeira xornada parecéronse en moi pouco ás resultantes finais. Unicamente, por así dicilo, salvouse de quéimaa o ENXUTO que volveu gañar a absoluta, aínda que esta vez por soamente 4 segundos de diferenza sobre un sensacional PIKO NORTE que xa lle foron collendo o tranquillo á Ría de Pontevedra, xa que eles proveñen da Coruña. Na Clase ORC 1 parecía que o MOFLETE novamente ía dominar a cuestión, pero unha rotura no spinaker na última popa relegouno aos infernos pasándolle os seus máis directos rivais como eran o AGUIEIRA e SEBRALA que quedaron por esta orde, producíndose finalmente un triplo empate na xeral final, resultando vencedor o AGUIEIRA por ser o gañador desta última etapa. En ORC 2, como diciamos, o ENXUTO volveu gañar, pero a partir de aí, ao seguirlle por esta orde PIKO NORTE, BILLA e MAR DE FRADES, produciuse outro triplo empate entre estes por a segunda posición decantándose a favor dos coruñeses e en detrimento de un MAR DE FRADES que foi de máis a menos na regata. E por último en ORC 3, primeira vitoria no seu historial do CAMARÓN 20 que con velas novas impúxose a un sorprendido SANTIAGO ROMA que a pesar de todo mantiña o tipo e levaba a xeral, onde lles seguiron outros dous barcios de Beluso, o AQUARI e o LIMAY.

A entrega de premios tivo lugar a mesma noite do sábado nos salóns do Real Club de Mar de Aguete, resultando galardoados os seguintes, ademais do premio absoluto ao ENXUTO,

En ORC 1, 1º) AGUIEIRA I (Sun Odissey 40 – Celestino Campelo – RCM Aguete) con 4 puntos;  2º) SEBRALA (Bavaria 50 – Magin Froiz – RCN Sanxenxo) con 4 puntos e 3º) MOFLETE II (Centurión 47 – Juan Carlos Pérez Olmedo – CN Combarro) tamén con 4 puntos.

En ORC 2, 1º)ENXUTO (First 310 – Pablo Conde – CN Cascais) con 2 puntos;  2º) PIKO NORTE (Bavaria 32 – José Manuel Castro – RCN Coruña) con 6 puntos; 3º) MAR DE FRADES (First 31.7 – Joaquin Carneiro – Ro Yatch Combarro) tamén 6 puntos;

E en ORC 3, 1º) SANTIAGO ROMA RIAS BAIXAS (Yatlant 24 – Iñaki Carbajo – CN Beluso) con 3 puntos; 2º)LIMAY (Bramador 34 – José Luís Smith – CN Beluso) 6 puntos e 3º) AQUARI (Oceanis 351- Luís Malvar – CN Beluso) con con 7 puntos.