E para comer Lugo faise máis forte no Gran Premio O Corte Inglés de Platu 25

Concluída a Cuarta Fase do Gran Premio O Corte Inglés de Platu 25 o E para comer Lugo, de Gonzalo Araújo faise máis forte no Circuíto vigués dos monotipos sendo, tras superar con brillantez a cita deste fin de semana, o novo líder da xeral, en detrimento do Mar de Frades, dos irmáns Paz, que se mantivo durante catro meses no máis alto da clasificación. O veleiro liceísta é agora segundo, moi preto en puntos do de Araújo, sendo terceiro o Sori, de Ramón Ojea, do Club Marítimo de Canido.

O fin de semana traía á Ría de Vigo unha nova cita coa competición dos coñecidos barcos da clase Platu 25, unha flota formada por excelentes regatistas de nivel.

Organizada polo Real Club Náutico de Vigo, coa colaboración do Concello de Vigo e a Autoridade Portuaria, a cuarta entrega do X Circuíto Cidade de Vigo, do seis das que consta o Gran Premio O Corte Inglés até o mes de abril, mantivo invicto na clasificación global ao Mar de Mar de Frades. A progresión do E para comer Lugo, no tres últimas Fases, que gañou con claridade, convérteno no firme candidato para facerse co título deste ano.

A xornada sabatina chegou moi cargada de auga, con fortes refachos de vento que, superando nalgúns momentos picos de 35 nós, fixeron que o Comité da regata, aprazase a saída prevista para as 14.30 horas. Tras o paso das mesmas, e unha vez comprobado que as condicións de navegación eran seguras, deuse unha primeira saída ás 15.15 horas, cunha compoñente que tiña o seu eixo no 260, é dicir, un suroeste, con 15-20 nós. Tras a primeira cinguida, cambio de percorrido ao irse o vento cara ao 280 (noroeste) levándose a proba o Mar de Frades, que estaba patroneado por Juan Debén.

Na segunda manga mantíñase o noroeste, 45 minutos despois da primeira saída, levándolla o E para comer Lugo, de Araújo. Non se farían máis mangas.

O domingo as condicións de mar e vento cambiaban de maneira radical, sendo máis apracibles, cunha ría moito mais tranquila e sen apenas onda, tan só o compás dun pequeno mar de fondo. Leve adiamento na auga e, pouco despois das 10.30 horas da mañá, comezaba a regata. Vento de bocana, do 65-70, con 12 nós e algo de neblina. Manteríase este eixo, variando ao 55 do nordeste con moito frío, na terceira proba dominical. O tres serían para o E para comer Lugo, que levaba a Cuarta Fase do Gran Premio O Corte Inglés e, por tanto, tras o seu tres últimas vitorias de Fase, convertíase no novo líder do Circuíto. Segundo nesta Cuarta Fase sería o Mar de Frades e, terceiro, o Sori.

O cómputo da xeral do Gran Premio O Corte Inglés, deixa ao E para comer Lugo, de Gonzalo Araújo, do Real Club Náutico de Vigo, con 34 puntos. Segundo é o Mar de Frades, dos irmáns Paz, do Liceo Casino de Vilagarcía, con 37 puntos. Terceiro atópase o Sori, de Ramón Ojea, do Club Marítimo de Canido, con 10 máis. A cuarta posición é para o Marvo, de Alberto Vello, con 63 puntos. E a quinta para o Sandokán, de Javi Porto e Alberto Martín, con 67 puntos. Estes dous últimos navegan con grímpola do náutico vigués.

A Quinta Fase, penúltima do Circuíto Cidade de Vigo, disputarase os días 15 e 16 de marzo.