Culleredo reúne a unhas 70 persoas na súa formación sobre o mal uso das redes sociais

O Plan Municipal contra as Adiccións que desenvolve o Concello de Culleredo dá este fin de semana un paso máis. O programa amplo, que abarca os diferentes ámbitos de actuación na materia, abordou onte os riscos do mal uso das redes sociais e hoxe as condutas adictivas nos mozos.

A xornada sobre as adiccións tecnolóxicas celebrada onte no Conservatorio suscitou un enorme interese entre os veciños. “Como previr e actuar ante posibles adiccións tecnolóxicas?” era o título da actividade, cunha asistencia de público de máis de 70 persoas. Foi organizada pola Concellaría de Sanidade, e a Asociación ANHIDA. O seu obxectivo consistiu en dar pautas ás familias para evitar os perigos e riscos que existen na utilización das novas tecnoloxías e redes sociais. Foi impartida por especialistas na materia.

Hoxe sábado o Concello comezou o Curso de Mediadores Xuvenís en condutas adictivas, cunha vintena de mozas participando. A iniciativa ten como finalidade a de formar a mozas, entre 19 e 29 anos como axentes de saúde para mediar entre iguais. A súa misión consistirá en promover estilos de vida saudables e o afastamento das condutas adictivas no seu grupo.

A actividade constará de 20 horas teórico-prácticas. Desenvólvese no Centro municipal de servizos sociais de Vilaboa. É impartida por persoal técnico da Asociación ACLAD, entidade coa que o Concello de Culleredo ten un convenio de colaboración desde o ano 2011, e por persoal do equipo municipal de Benestar Social.

Aula Aberta

Desde o mes pasado os veciños de Culleredo contan cunha Aula Aberta sobre adiccións que con carácter mensual ofrecerá asesoramento e información sobre calquera tipo de adicción.

As sesións teñen carácter permanente ao longo de todo o ano. Son os martes primeiros de mes, no centro de servizos sociais do Burgo (sito na costa dá Lonxa), en horario de 12.30 a 13.30 horas.

A aula, impulsada desde a Concellaría de Sanidade, está dirixida por unha psicóloga especialista da asociación ACLAD.

A concelleira de Sanidade, Penélope López, explica que o obxecto da aula Aberta é proporcionar información “a nivel preventivo ou de orientación inicial” sobre calquera problema de adicción “pequeno ou grande” que lles suceda aos propios asistentes ou algún familiar ou amigo. Para acudir á Aula non é necesario formalizar ningunha inscrición previa. “Pódese asistir de forma libre para simplemente escoitar e tamén para expor calquera cuestión ou inquietude”, apunta López. O Concello ofrece tamén a aqueles participantes que o demanden unha orientación persoal que podería comezar cunha entrevista individualizada.