Carlos Negreira é elixido novo presidente do Eixo Atlántico

O alcalde da Coruña, Carlos Negreira, foi elixido, esta mañá, en Braga, novo presidente do Eixo Atlántico, unha entidade que representa a 7 millóns de habitantes. Con este nomeamento, A Coruña xogará un papel referente en Europa e reforzará a súa presenza e liderado no exterior, dado o seu carácter cosmopolita e de vangarda. O rexedor subliñou que o Eixo Atlántico é a plataforma perfecta para desenvolver en común novos proxectos turísticos, culturais, deportivos e económicos, ademais de servir para que as cidades compartan as súas estratexias e esforzos, co océano Atlántico como punto de encontro.

O alcalde destacou que o Eixo Atlántico é unha oportunidade para optar aos fondos da Unión Europea para o período 2014 – 2020, que se destinarán ás áreas de mobilidade, sustentabilidade, innovación e inclusión social, que son as claves para as cidades que, nos próximos anos, aspiran a ser activas, competitivas e líderes.

Neste sentido, Carlos Negreira incidiu na importancia de articular as comunicacións entre Galicia e o norte de Portugal, prestando especial atención ao tren O Porto – Vigo que permitirá á súa vez a conexión en alta velocidade con Ferrol. Así mesmo, subliñou que o obxectivo das cidades do século XXI é reducir a emisión de CO2 e lograr o cero emisións de carbón. No campo da innovación e as novas tecnoloxías, o alcalde lembrou que A Coruña é xa un referente en España, con iniciativas pioneiras como Smart City, unha experiencia que se trasladará ás outras cidades do Eixo Atlántico. Outra das prioridades será a inclusión social: axudar ás persoas que o necesitan, lograr unha sociedade cohesionada e integrada e conseguir a paz social, o valor económico máis importante.

O novo presidente do Eixo Atlántico, Carlos Negreira, toma a substitución do alcalde de Viana do Castelo, José María Costa. A vicepresidencia da entidade estará a cargo do rexedor de Braga, Ricardo Río. Na Asemblea, tamén se renovou a executiva que contará coa representación das cidades do Barco de Valdeorras, Monforte de Lemos, Lalín, Bragança e Barcelos, Matosinhos, xunto ao Porto e Vigo, que como fundadores da entidade, son membros natos.