Aduanas atopou “facturas” que evidencian agasallos para políticos de Santiago e do entorno

Un informe do Servicio de Vigilancia Aduanera revela que un rexistro en Santiago de Compostela da delegación de Vendex, matriz da trama que investiga a ‘Operación Pokémon’, ratifica a existencia de probas documentais que evidencian a compra de regalos a políticos da capital galega e do seu entorno.

Segundo reflicte este documento, incluído na parte do sumario da ‘Operación Pokémon’ que se acaba de levantar, durante o rexistro no despacho do delegado da empresa en Santiago saíron á luz unha serie de documentos, entre os que figuran “facturas e tickets” de regalos para membros do goberno que dirixe Ángel Currás e tamén dos seus predecesores, así como a edís doutras cores políticas.

Tamén figuran no listado políticos do ámbito da capital galega, entre os que atopan o rexedor de Teo (A Coruña), Martiño Noriega (Anova), aínda que este –ao igual que outros dirixentes– remitiu unha carta rexeitando o presente.

Os efectivos de Vigilancia Aduanera atoparon no rexistro, ademais de facturas e tickets, outros documentos como un listado “con nome, apelidos e cargos” dos políticos aos que se pretendía agasallar, así como “a categoría” do regalo a recibir.

DIXITALIZACIÓN

O Xulgado de Instrución Número 1 de Lugo comunicou o martes ás partes o levantamento do segredo da maior parte do sumario da ‘Operación Pokémon’, que afecta a 122 tomos, dos cales, ata o momento, 55 deles foron dixitalizados.

En 73 dos 122 tomos enumerados hai folios sobre os que a xuíza instrutora aínda mantén o segredo, así como nas actuacións que se practiquen en relación con estes.

En concreto, foi decretada a continuidade do segredo das manifestacións da concelleira de Réxime Interior e Persoal de Santiago, Amelia González Brandariz; o exalcalde Gerardo Conde Roa; o exedil de Seguridade compostelano Albino Vázquez Aldrey; a que fose concelleira e actual voceiro do PPdeG, Paula Prado; e do marchante de arte Leonard Patterson. Todas elas forman parte dunha peza separada.

Esas declaracións, segundo sinala a xuíza nun auto transcribiranse parcialmente co fin de non interferir no resultado doutras investigacións en curso”, facilitándose ás partes nas pezas correspondentes “a súa transcrición parcial”.