A Policía leva unha ducia de caixas con documentos das oficinas de Eiriña en Pontevedra

Funcionarios da Unidade de Delincuencia Económica e Fiscal (UDEF) da Xefatura Superior de Policía de Galicia e persoal xudicial levaron esta noite en torno a unha ducia de caixas con documentación solicitada nas oficinas que a construtora Eiriña ten na cidade de Pontevedra.

Tras varias horas de rexistro, a comisión xudicial abandonou a sede de Eiriña situada na Praza 8 de Marzo, esquina con Eduardo Pondal, en torno ás 22.45 horas. Segundo fontes presenciais consultadas, a inspección destas oficinas iniciaríase en torno ás 10.00 horas deste martes.

As caixas coa documentación solicitada foron introducidas nunha furgoneta branca non etiquetada. O dispositivo estivo constituído por unha ducia de axentes entre persoal do xulgado e policías de paisano, aparte de dous axentes uniformados que custodiaron a porta de entrada.

O rexistro na sede de Eiriña en Pontevedra ten lugar no marco da Operación Patos, que coordina o xulgado de instrución número sete de Vigo e que investiga delitos de prevaricación, suborno e tráfico de influencias na adxudicación de contratos públicos.

En varios dos seis concellos e diversos organismos públicos nos que se practicaron rexistros solicitouse documentación sobre adxudicacións a esta empresa fundada en Bora (Pontevedra) no ano 1973 e que se dedica a obra pública, estradas, saneamento e edificación.