A Coruña abrirá unha convocatoria para solicitar subvencións para accións de promoción e reinserción social

O Concello da Coruña aprobará mañá, venres 7 de febreiro, na sesión ordinaria de Xunta de Goberno Local, a convocatoria pública de subvencións, por un importe total de 130.000 euros, para que entidades coruñesas promovan en 2014 actividades de promoción e reinserción social.

A Concellaría de Servizos Sociais levará á Xunta de Goberno Local a súa proposta para destinar 130.000 euros a esta convocatoria pública de subvencións, ademais de aprobar a inserción do anuncio no Boletín Oficial da Provincia (BOP) para informar e abrir o prazo de presentación de solicitudes.

As subvencións teñen como finalidade a realización de actividades de promoción e reinserción social e a prestación de servizos sociais, dentro do termo municipal da Coruña, ao longo do ano 2014. As entidades, que deberán contar coa súa sede social ou cunha delegación na Coruña, poderán optar a unha subvención que alcance até o 80% do importe total da actividade subvencionada. Ademais, nunha única solicitude, poderán solicitarse axudas para unha ou varias accións.

As entidades sociais poden solicitar subvencións para gastos de funcionamento, para gastos indirectos necesarios para o desenvolvemento das súas actividades (arrendamento do local social, auga, teléfono, luz e papelería) e para outros gastos correntes relacionados directamente coas accións que desenvolverá en 2014.

Aprobada esta convocatoria pública mañá na Xunta de Goberno Local, o Concello terá luz verde para remitir un anuncio ao Boletín Oficial da Provincia para a súa posterior publicación. As solicitudes poderán presentarse durante o prazo dun mes, que empezarán a contar a partir do día seguinte da súa publicación no BOP.

Á hora de conceder as subvencións, o Concello terá en conta o interese xeral do proxecto ou das accións programadas pola entidade, a xustificación de devandito proxecto, a capacidade de xestión para levalo a cabo, quen serán os beneficiarios directos (con especial atención a sector específicos da sociedade, como menores, novas, persoas maiores e mulleres), ou que o proxecto sirva de complemento ás actividades desenvolvidas polo Goberno municipal, así como a duración das accións sociais.