A campaña intensiva de limpeza de rúas vilagarciáns entra a vindeira semana en Vilaxoán

Despois dos traballos realizados en Sobrado e a súa contorna, a campaña intensiva de limpeza de rúas chega esta semana a Vilaxoán. Operarios municipais e de Cespa reforzados coa maquinaria da concesionaria encargaranse de realizar os traballos de lavado en profundidade de rúas, beirarrúas, tragantes e contedores de lixo do rueiro vilaxoanés.

Como de costume, esta nova fase da campaña intensiva de limpeza comezará coa avanzadilla dos operarios municipais que farán un primeiro repaso manual ás rúas obxecto da limpeza, encargándose de desatascar tragantes e arquetas e de retirar herbas. Estas labores comezarán o luns de xeito que o mércores, primeira xornada na que intervirá a maquinaria de baldeo, varrido e lavado de contedores.

Nesa primeira xornada, a do mércores 12 de febreiro os traballos iniciaranse a primeira hora da coa limpeza do tramo da avenida de Cambados que vai entre a confluenza da rúa Ameixeiras e a avenida de Vilanova. Entre as sete e as dez da mañá actuarase nas rúas San Cibrán (confluencia avenida de Cambados coa travesía San Cibrán), a travesía San Cibrán, e as rúas benigno santos e Bouza de Abaixo. A partir das dez da mañá, a limpeza afectará as rúas Bouza de Arriba, Praza do Eirado, Rúa da Finte, Saralegui, Vázquez Leis, Rafael Pazos, General Pardiñas e Eiras.

O xoves, 13 a campaña de limpeza continuará polas rúas Víctor Pita, Avelina Nogueira e Rúa Peirao entre as sete e as dez da mañá. A partir desta hora e ata a unha da tarde procederase a limpeza da Avenida do Preguntoiro, O Freixo, e Camiño do Freixo.

A limpeza do rueiro vilaxoanés complétase o venres cunha primeira pasada das máquinas programada entre as sete e as dez da mañá e que se centrará na avenida de Vilanova. No último tramo da mañá, as labores de limpeza trasladaranse ás rúas Veiga do Mar (confluencia da Avenida de Vilanova con Sartaches), Rúa Sartaches, Jorge Domínguez Padín (e todo o contorno de vivendas da Atlántida), Ramón Paredes e travesía Veiga do Mar.

Prégase a colaboración cidadá

O Concello puxo en marcha no mes de novembro esta campaña intensiva de limpeza de rúas co obxecto de mellorar a imaxe dos cascos urbanos do municipio. Para que estes traballos dean o resultado esperado precísase a colaboración dos veciños que deberán facilitar as labores de limpeza deixando libres os estacionamentos de vehículos das rúas nas que estea previsto actuar. A retirada dos coches deberá facerse antes de que se inicien os traballos e poderán volver a utilizarse tan pronto como remate o paso da maquinaria de limpeza. O Concello prega a maior colaboración dos veciños e condutores para que todos os cidadáns poidan gozar dunhas rúas máis agradables e limpas.