A Agrupación Deportiva Vincios de Gondomar loitará pola conseguir a vitoria no Torneo Estatal de Tenis de Mesa

Hoxe dará comezo, ás 16.00 horas, en Valladolid o Torneo Estatal de Tenis de Mesa abrindo a competición as categorías Benxamín, Cría, Infantil e Xuvenil. O resto de categorías (sub-23, Absoluta, Sénior, Veteranos e Persoas con Minusvalía Pé e Cadeira) comezarán a partir das 9:00 horas do día seguinte, o sábado 1 de marzo. Todas as categorías finalizarán antes do domingo 2 de marzo ás 15:30 horas.

Os mellores xogadores nacionais de cada categoría daranse cita neste evento e un ano máis a Agrupación Deportiva Vincios estará representada no devandito campionato polos xogadores que conseguiron clasificarse no Zonal celebrado en Lalín o pasado mes de outubro. Nesta ocasión todo o peso do club recae sobre os ombros de Martín Pintos en categoría Xuvenil, Anxo Iglesias e Natalia Fernández en categoría Infantil, Andrés Torres en Cría e Luisa Pintos en Benxamín. Hai que sumar a participación de Lucía Graña en categoría Infantil, quen conseguiu unha praza para o Estatal ao quedar campioa no Torneo Clasificatorio celebrado en Alcobendas o pasado mes de novembro, e de Jorge Larrondo, quen entra por cota en categoría infantil.

Acompañados polos adestradores do club Antonio Gregorio, Ángel Iglesias e Samuel Pereiro intentarán seguir obtendo éxitos e demostrar o seu bo nivel de xogo.