Xantar, única feira internacional turístico-gastronómica de España

Presentación de Xantar en Fitur

Xantar estreouse esta tarde en Fitur como Feira Internacional nun acto celebrado na caseta de Galicia que contou coa presenza da Directora da Axencia de Turismo de Galicia, María Nava Castro, o Ministro de Turismo da República de Cuba, Manuel Marrero Cruz, o Secretario Xeral de Emigración da Xunta de Galicia, Antonio Rodríguez Miranda, o embaixador de Cuba en España, Eugenio  Martínez Enríquez, o vicepresidente da Cámara de Comercio de Ponta Delgada (Azores), Horacio Franco, o presidente do Clúster de Turismo de Galicia, Francisco González e o Director xeral de Expourense e director de Xantar, Alejandro Rubín. 

O director de Xantar presentou os detalles da próxima edición e convidou aos asistentes a realizar unha viaxe enoturístico-gastronómico por distintos países a través de Xantar.

Durante a súa intervención, o Ministro de Turismo de Cuba fixo referencia á importante herdanza galega na cociña cubana e comentou que “eventos como Xantar contribuirán a estreitar os lazos históricos que unen a Cuba e Galicia”.

Pola súa banda, a Directora da Axencia de Turismo de Galicia indicou que “Xantar, cita ineludible para o sector, é un perfecto exemplo de colaboración interadministrativa e intersectorial, algo que redunda no beneficio de todos”.

Detalles do Salón

O Salón Internacional de Gastronomía e Turismo celebrarase en Expourense entre o 5 e o 9 de febreiro co Selo de “Feira Comercial Internacional” que outorga a Secretaría de Estado de Comercio do Ministerio de Economía e Competitividade do Goberno de España, o que o converte nunha do cinco citas internacionais de turismo celebradas en España (dous das cales organiza Expourense). Esta resolución identifica como “Feiras Comerciais Internacionais de 2014” a 86 salóns celebrados a nivel nacional, dos cales só 5, manteñen unha relación directa en materia de turismo, e Xantar é a única delas que o relaciona coa gastronomía. Consolídase así como unha plataforma de promoción de España a través dun dos seus maiores atractivos, a gastronomía, que supón ademais un dos apartados de maior desembolso económico para o turista, ao redor de 108 euros por visitante  ao día, o que supón máis de 6.400 millóns de euros ao ano.

Este Selo de Internacionalidad recoñece a traxectoria do salón desde que no 2007 incluíu por primeira vez a figura do país invitado. Ademais de contar coa presenza de Portugal desde a súa primeira edición, até este momento foron destacados México, Portugal ou algún dos seus gobernos autónomos como os Azores, Arxentina, Francia, e Perú, países que continúan vinculados, edición tras edición.

Cuba, país invitado

Ademais da internacionalidad, a outra gran novidade da próxima edición do salón é a participación de Cuba como país invitado. Turismo de Cuba estará presente en todas as accións previstas en Xantar, promocionando a súa gastronomía, turismo e artesanía. Contará cun restaurante liderado pola Sociedade Cultural Rosalía de Castro, que é un dos Centros Galegos da Habana. O menú que presenta a illa recolle algúns dos seus pratos máis emblemáticos como o ajiaco criollo ou o arroz con frijoles negros.

Entre as actividades que impartirán destaca o showcooking de gastronomía cubana, unha cata comentada de ron, degustación de cócteles e a exposición da artesá Gloria Sánchez Reyes, especializada en patchwork.

A participación deste país como protagonista xorde da colaboración entre o Ministerio de Turismo de Cuba e Expourense, coa intermediación da Secretaría Xeral de Emigración da Xunta de Galicia. Cuba únese así á lista de invitados especiais en Xantar, en cuxa elección se destacan os lazos que unen a historia e a gastronomía deses países cos de Galicia, como foi o caso de México, Arxentina ou Perú, entre outros.

Restauración

Na 15ª edición de Xantar participan un total de 18 restaurantes procedentes de Galicia, de comunidades autónomas invitadas (Asturias e Castela e León) e varias rexións turísticas de Portugal, ademais de Cuba. En total, ofreceranse máis de 30 menús, entre 12 e 30 euros, baseados nos seus produtos autóctonos e de calidade, xa que a maioría inclúen alimentos amparados por unha Denominación de Orixe ou Indicación Xeográfica Protexida. Contribuirase así á posta en valor dos produtos agrogandeiros e pesqueiros de calidade. Ademais, poranse en valor os beneficios para a saúde dos alimentos comprendidos na Dieta Atlántica e incluirán distintos menús aptos para celiacos.

Portugal

Portugal volverá ser un dos protagonistas desta cita gastronómica. Ademais da presenza de restaurantes das rexións de Porto e Norte e Centro e de varias entidades e empresas como expositores, está confirmada a visita de delegacións empresariais relacionadas co turismo e a gastronomía, tanto do Portugal peninsular como das Illas Azores.

Actividades

O programa de actividades de Xantar 2014 incluirá tanto conferencias de expertos como exhibicións de cociña en directo, ademais de catas comentadas e degustacións incluídas no chamado “Encontro Ibérico sobre Dieta e Saúde” que afronta xa a súa 9ª edición. En total, máis de 100 actividades orientadas a profesionais e afeccionados e que por primeira vez serán de carácter gratuíto.

Entre as novidades desta edición destaca a conferencia inaugural “Seguridade Alimentaria e a colaboración público-privada no desenvolvemento dos agronegocios” impartida polo conselleiro principal de Cooperación Técnica da FAO (Organización de Nacións Unidas para a Alimentación e a Agricultura), Alberto López-Asenjo que analizará como afrontar os grandes retos relacionados cunha alimentación saudable e nutritiva, xa que a pesar dos avances, aínda hoxe preto de 870 millóns de persoas no Mundo sofren desnutrición.

Entre os talleres de cociña en directo desta edición destacan, entre outros, os de gastronomía de Entroido impartido polo Grupo Nove, o de cociña ao baleiro e conservación de alimentos ofrecido polo Centro Superior de Hostalaría de Galicia, ademais dos ofrecidos pola Consellería do Medio Rural e do Mar que terán a finalidade de pór en valor os produtos con Denominación de Orixe galegos. Non faltarán tampouco talleres de cociña das distintas rexións participantes, de repostaría para celíacos, de gastronomía sefardí ou de repostaría creativa, unha das tendencias actuais con máis seguidores.

Este programa completarase con catas comentadas de viños naturais D.Ou. Ribeira Sacra ou de aceites galegos e andaluces, entre outros, e degustación de produtos das cooperativas galegas ou dos protagonistas das festas gastronómicas de Interese Turístico.

Celebrarase tamén a segunda edición do “Concurso Prato Xantar” que nesta ocasión conta con dúas categorías: profesionais e afeccionados. Os interesados en participar deben preparar unha receita con polo menos tres produtos con Denominación de Orixe e inscribirse a través da web do salón.

Entre as novidades deste ano destaca o feito de que Xantar será o espazo elixido para realizar un encontro de bloggers gastronómicos previsto para o xoves 6 de febreiro que contará con participantes de Galicia, Asturias e Castela e León.

Outra das novidades é o salto dado polo Encontro de Confrarías Gastronómicas e Enófilas que alcanzará a súa décima edición o xoves 6 de febreiro de 2014. O carácter internacional que conseguiu este encontro fai varias edicións vese reforzado este ano coa presenza dunha trintena de confrarías procedentes de toda España, Portugal e Francia e que exaltan distintos produtos de calidade como o queixo manchego ou o viño de Rioxa ou que responden a unha tradición de máis dun século como a Chaine deas Rotisseurs que ademais celebrará un capítulo especial no salón.

Promoción do turismo de proximidade

Xantar 2014 puxo en marcha diversos paquetes turísticos que teñen o obxectivo de fomentar o turismo interno e de proximidade estimulando ao público final a visitar Ourense e reforzar un dos obxectivos principais desta cita: promocionar o turismo a través da gastronomía. A partir de 69 euros, este paquete comercialízase a través da organización e de axencias de viaxes (Operador Máis Costas) que inclúe aloxamento en réxime AD, entrada ao salón e comida ou cea nun dos restaurantes.

Xantar creou unha experiencia gastronómica orientada aos visitantes procedentes, sobre todo, da Coruña e Santiago de Compostela que poden achegarse a Ourense na liña de Alta Velocidade, AVANT. Convén lembrar ademais que todos os visitantes que acudan ao salón en tren desde calquera parte de España obterán un 30% de desconto que pode obterse en www.xantar.org.