Vázquez Abad comproba a habilitación de novos espazos no IES Antonio Fraguas de Santiago

Vázquez Abad na visita ao centro educativo

O conselleiro de Cultura, Educación e Ordenación Universitaria, Xesús Vázquez Abad, visitou esta mañá o compostelán IES Antonio Fraguas, tras as obras realizadas para habilitar un novo espazo destinado a ser o salón de actos con capacidade para 160 espectadores e especialmente dirixido ao alumnado do bacharelato de artes escénicas, música e danza. Para crear este novo espazo utilizouse a antiga aula de informática unida; tras tirar un tabique, a outra tamén dispoñible no centro. Asemade o conselleiro, acompañado polo director xeral de Centros e Recursos Humanos, José Manuel Pinal e o xefe territorial de Educación na provincia da Coruña, Indalecio Cabana, comprobou o resultado das obras de mellora no cableado nun aula de informática.

Con esta visita o conselleiro comprobou o resultado das melloras realizadas no centro e que comprometera na visita realizada o pasado mes de agosto, ao tempo que volveu a dar conta da axilidade da Consellería na resposta as necesidades educativas, a pesares da difícil situación económica. Cómpre sinalar que o departamento educativo da Xunta de Galicia leva investido nos últimos anos preto de 280.000 euros na implantación de programas educativos innovadores e en melloras nas instalacións deste instituto.

O centro

Cómpre lembrar que o IES Antonio Fraguas conta tamén con 9 aulas Abalar e participa no programa Axenda 21 Escolar de Galicia, incluído no Plan Proxecta, liderado pola Consellería de Cultura e Educación para englobar todas as actuacións dos diferentes departamentos da Xunta de Galicia dirixidas a fomentar a innovación educativa nos centros de ensino. Así mesmo, na biblioteca do centro – integrada no Plan de Mellora desde o curso 2011/2012- desenvólvense clubs de lectura de forma habitual.

Xesús Vázquez estivo acompañado na súa visita polo director do centro, Mario Díaz Pulido; e polo xefe territorial da Consellería na provincia da Coruña, Indalecio Cabana. Durante o seu percorrido polo IES, o conselleiro tivo ademais a oportunidade de comprobar o resultado das obras realizadas de cerramento da escaleira principal do centro, co fin de mellorar a seguridade dos preto de 600 alumnas e alumnos do Antonio Fraguas. Ademais, ao abeiro do devandito investimento, o departamento dirixido por Vázquez Abad leva realizado obras nos últimos anos para a reparación da cuberta do pavillón e instalación de lucernarios no mesmo, para o acondicionamento das aulas de música e para melloras nas instalacións informáticas e no cuarto de caldeiras.