Sete detidos polo secuestro do empresario de Cambre ao que ameazaban con matalo ou causarlle graves amputacións

Lugar no que se atopaba o secuestrado

A Garda Civil confirmou a detención de sete persoas como presuntas autoras de detención ilegal no marco da operación articulada para liberar a un empresario que ten un serradoiro en Cambre (A Coruña). Fora secuestrado o pasado sábado e foi localizado e liberado nun galpón en Lalín (Pontevedra) a pasada noite.

Aínda que a operación segue aberta, os detidos até o momento son sete, teñen nacionalidade española e idades próximas aos 60 anos; entre eles atoparíase un matrimonio maior que se encargaba de custodiar ao refén. Ademais, durante a liberación incautouse unha pistola.

Así mesmo, no momento da detención na localidade de Melide (A Coruña) de dous dos secuestradores, ambos tentaron darse á fuga embestindo a un vehículo dos axentes que tentaban interceptalos, sendo reducidos e detidos finalmente.

A familia do secuestrado denunciara ante a Garda Civil de Betanzos o sucedido o domingo, indicando que os captadores pedían unha gran cantidade de diñeiro (supostamente uns 70.000 euros) de rescate para a liberación do empresario que ten un serradoiro familiar en Cambre (A Coruña).

Unidades de investigación criminal da Garda Civil da Coruña e o Equipo de Secuestros e Extorsións da Unidade Central Operativa (UCO) desprazados desde Madrid iniciaron unha investigación para proceder á liberación do secuestrado e, en menos de cinco días, localizaron unha granxa en Xar, Vilatuxe (Lalín), onde os secuestradores mantiñan ao empresario.

O habitáculo no que se atopaba o secuestrado era un pequeno alpendre dentro da granxa. Fontes próximas á investigación indicaron que estaba coas mans atadas e encapuchado, “en condicións infrahumanas”, segundo a Garda Civil.

SECUESTRO E AMEAZAS

Os investigadores do caso descubriron que foi o pasado sábado 18, “mediante engano”, cando os secuestradores conseguiron levar ao empresario até un bosque afastado da vivenda da familia coa escusa de realizar un negocio da madeira.

Unha vez no lugar, abordáronlle e pola forza introducírono no maleteiro dun vehículo, trasladándoo a un primeiro alpendre, sufrindo o secuestrado “unhas temperaturas extremas” polo que foi movido posteriormente a un anexo da propia vivenda habitual dalgún dos secuestradores, onde lle tiveron encapuchado e ameazado durante todo o tempo.

A Garda Civil concretou que durante as negociacións entre os secuestradores e a familia, esta sufriu unha gran tensión, xa que os secuestradores constantemente “ameazaban con matar ao secuestrado ou con ocasionarlle amputacións graves”.

“AMPLOS ANTECEDENTES”

A Garda Civil encadra este suceso dentro dos denominados “secuestros extorsivos” no que o secuestrado e a súa familia non coñecen aos secuestradores. O secuestro estaba planeado desde fai máis de tres meses, de acordo cos datos que saíron á luz na investigación.

Os xefes da organización, con amplos antecedentes policiais e penais, tiñan episodios anteriores de extorsións. A Garda Civil sostén que foron “perfeccionando” o seu modus operandi até “chegar a deixar moi poucas pistas” para que os investigadores puidesen relacionalos co feito delituoso e co secuestrado.

ASALTO E LIBERACIÓN

A pesar de todas as dificultades, o secuestrado foi localizado, segundo os investigadores, “na tarde noite” do xoves e liberado nun asalto por unidades especiais na madrugada de hoxe, xusto cando expiraba o prazo dado polos secuestradores que, polos primeiros testemuños recolleitos, tiñan previsto o asasinato.

Levou a cabo a operación a Policía Xudicial da Comandancia da Garda Civil da Coruña, conxuntamente co Equipo de Secuestros e Extorsións da Unidade Central Operativa (UCO), equipo altamente cualificado que nas últimas semanas participou directamente na liberación de dous empresarios españois secuestrados en México polo procedemento do denominado “secuestro exprés”, e de dous presuntos narcotraficantes que foron secuestrados en Tunes por desacordos entre delincuentes nos seus negocios turbios.

A OPERACIÓN SEGUE ABERTA

Esta operación de liberación, polo perigo dos captadores e a dificultade que ofrecía o lugar de custodia do empresario, foi levada a cabo pola Unidade Especial de Intervención (UEI) da Garda Civil, os especialistas do Corpo en operacións extremas como a liberación de reféns en secuestros de aeronaves ou cárceres, e con experiencia na detención de comandos de ETA.

Foi necesario desprazar desde Madrid equipos técnicos que contribuíron ao éxito da operación onde tamén se contou co apoio dun helicóptero do Corpo.

A operación está dirixida por un Xulgado de Instrución de Betanzos (A Coruña) co auxilio xudicial do de Lalín (Pontevedra), continúa aberta polo que non se descartan novas detencións.