Ponte Caldelas solicitará pasos elevados na avda. de Pontevedra despois dun novo accidente

Lugar no que aconteceu o sinistro

O alcalde de Ponte Caldelas, Perfecto Rodríguez, manterá unha entrevista urxente de traballo co delegado territorial da Xunta en Pontevedra, Xosé Manuel Cores Tourís, para solicitarlle que a administración autonómica converta polo menos dúas do catro pasos de peóns existentes na a Avda. de Pontevedra (tramo urbano da estrada autonómica PO-532) en pasos sobreelevados co fin de mellorar a seguridade viaria na zona. A estes efectos solicitou á Policía Local a elaboración dun informe.

O rexedor, que visitou de inmediato a zona onde tivo lugar esta mañá o atropelo dun viandante na Avda. de Pontevedra, pedirá á Xunta que elabore un estudo para mellorar a seguridade viaria no tramo urbano da PO-532 co fin de que se proceda á elevación de, polo menos, dous pasos de peóns existentes (o situado nas inmediacións do Edificio Sol e o situado xunto ao cruzamento da Avenida de Pontevedra con cálelas Brasil e Concepción Arenal, lugar do accidente). A Avenida de Pontevedra constitúe o eixo transversal  do núcleo urbano de Ponte Caldelas con moito tráfico e que tamén se atopa transitado por gran número de peóns que teñen que cruzala para dirixirse á zona escolar onde se sitúan a gardaría municipal, a ludoteca, o CEIP Cordo Boullosa, o instituto e o principal parque infantil da vila. Os vehículos que veñen de Pontevedra en dirección cara a Ponte Caldelas, adoitan facelo a gran velocidade ao ser costa abaixo, sen reparar en que se trata dun tramo urbano e sen respectar en moitos casos os pasos de peóns existentes.

Recentemente tamén a petición de Perfecto Rodríguez xa se elevaron os pasos de peóns  nas rúas da Ponte e López Boullosa aproveitando a reforma da estrada autonómica PO-255 entre Ponte Caldelas e Caritel.

Dentro do interese por mellorar a seguridade viaria no municipio, o Concello tamén acometeu en diversas rúas da localidade de competencia municipal a creación de pasos sobreelevados como, por exemplo, a Avda. de Vigo, reinaugurada a súa remodelación e humanización hai escasamente mes e medio. Pero a Avda. de Pontevedra é competencia da Xunta por tratarse dun viario autonómico.

O alcalde, Perfecto Rodríguez, espera que a sensibilidade da Xunta permita acometer esta mellora na seguridade viaria na estrada autonómica PO-532 (Avda. de Pontevedra) ao seu paso polo centro urbano de Ponte Caldelas  para evitar sucesos como o ocorrido esta mañá, xa que estudos recentes aseguran que pór pasos de peóns sobreelevados diminúe a velocidade dos vehículos e aumenta a seguridade dos peóns nestes tramos urbanos.