Os portos de Vigo e Nantes estudan vías de colaboración para aumentar os seus tráficos

Os portos de Vigo e Nantes iniciaron contactos co obxectivo de establecer posibles vías de colaboración para incrementar os seus tráficos.

Así o anunciou esta mañá en rolda de prensa o Presidente da Autoridade Portuaria de Vigo, Ignacio López-Chaves, tras visitar a semana pasada as instalacións da terminal francesa.

Segundo afirmou, é a primeira vez que un Presidente visita a Autoridade Portuaria de Nantes, onde se reuniu co seu homólogo, Jean Pierre Chalus, ademais de persoal directivo e cargadores de empresas portuarias.

Durante a súa visita, a delegación viguesa, encabezada polo seu Presidente, tivo a oportunidade de coñecer de primeira man as infraestruturas da terminal gala, con quen mantén importantes relacións comerciais. De feito, en 2013, o tráfico portuario entre ambos os portos superou as 327.000 toneladas, das que máis de 213.000 foron embarcadas desde Vigo con destino Nantes-Saint Nazaire, o que demostra o peso das exportacións viguesas. Entre as mercadorías máis destacadas, figuran os automóbiles, con máis de 78.000 toneladas movidas o ano pasado, os semirremolques (70.000 toneladas) e as pezas auto (58.000 toneladas). “Somos o seu principal cliente e a intención é incrementar eses intercambios comerciais”, subliñou.

Segundo apuntou o máximo responsable portuario, a terminal de colectores de Nantes ten un tráfico similar ao de Vigo, cun movemento anual próximo aos 200.000 TEUs, aínda que no caso do tráfico ro-ro, Vigo posúe múltiples conexións con outros países, como Turquía, América, Sudamérica… De aí o interese de Nantes por aproveitar as súas sinerxías.

Aproveitar sinerxías

“Somos un porto apetecible para quen queira distribuír a súa mercadoría desde Vigo”, asegurou López-Chaves, á vez que destacou as posibilidades de crecemento futuro de Nantes, onde se instalaron moitas empresas novas e onde se proxecta ademais un crecemento poboacional e económico importante.

De aí a importancia de buscar puntos estratéxicos entre ambas as terminais e aproveitar a condición de Vigo como “porto hub” de distribución de vehículos e outras mercadorías a nivel mundial, “o que nos converte nun porto atractivo como lanzadeira para outros destinos”.