Os populares de Ourense levan documentación ao xulgado para investigar irregularidades en contratos do concello

O PP acudiu ao xulgado de instrución número 1 de Ourense para achegar documentación “complementaria” á denuncia presentada polos sindicatos CIG e USO sobre posibles irregularidades na contratación, por parte do concello, de técnicos externos para a área de Urbanismo.

Ante a entrada principal dos xulgados, parte dos 11 concelleiros do PP de Ourense mostraron a documentación que presentarían “para complementar a denuncia sindical” presentada en 2013, tal e como explicou o portavoz popular, Rosendo Fernández.

Segundo Fernández, hai “múltiples” reparos constatados en informes do interventor municipal á contratación de asistencias técnicas.

Ademais, como dixo, cinco traballadores externos denunciaron a súa situación laboral e “conseguiron senllas sentenzas que obrigaban ao concello a optar entre indemnizalos ou readmitilos como traballadores laborais indefinidos”.

Tal e como detallou, optouse entón por contratar ao cinco técnicos, “formalizando así a súa entrada ao concello pola cheminea, ou pola porta falsa”.

“VENCER A TENTACIÓN”

Pero, ironizou o portavoz popular, os responsables do concello “deben de pensar que a mellor forma de loitar contra a tentación é caer nela”, porque “tras esas sentenzas volveuse a contratar a un técnico externo o verán pasado, que aínda non denunciou a súa situación, e cun salario superior aos 2.000 euros ao mes”.

“Non entendemos por que a área de Urbanismo non bota man dos seus propios traballadores, que os hai e bos”, sostivo, para xustificar así a súa achega ao xulgado de nova documentación.

“MALGASTO”

Os papeis do PP inclúen información sobre a contratación dun despacho de arquitectos da Coruña ao que se pagou, desde 2008, un total de 249.000 euros, “por temas urbanísticos”. Ademais, un despacho xurídico facturou desde 2007 un total de 151.100 euros ao Concello de Ourense.

“Isto é un dispendio, un auténtico malgasto e desenfreo na área de Urbanismo”, sentenciou e engadiu que o seu grupo considera que a única forma de evitar isto “é denuncialo, porque non pairan”.