O venres celébrase na Coruña o Trofeo Anxos Barreiro de atletismo

O Concello da Coruña, a través da Concellaría de Deportes que dirixe Francisco Mourelo, informa da celebración do Trofeo Anxos Barreiro o vindeiro venres, 17 de xaneiro, nas pistas universitarias de Elviña. O evento está organizado polo club de atletismo Marineda Atlético e conta coa colaboración do Concello.

Os interesados en participar poderán realizar a súa inscrición até as 20.00 horas de hoxe, mércores 15 de xaneiro, na páxina web da RFEA (Real Federación Española de Atletismo) http://isis.rfea.es/sirfea2/. Os atletas deben facer constar o seu mellor marca da tempada ao inscribirse. Entregaranse medallas ao tres primeiros de cada proba (independentemente da categoría) e un trofeo ao mellor home e á mellor muller segundo táboa IAAF.

O trofeo leva o nome de Anxos Barreiro en honra á atleta coruñesa lanzadora de disco que foi a primeira en superar os 50 metros e a primeira en romper a barreira dos 60 metros. Ao longo da súa carreira elevou a marca nacional en máis de 12 metros, algo único na historia do atletismo español. Conseguiu en 11 ocasións o Campionato de España e recibe, así, unha emotiva homenaxe por levar o atletismo galego e coruñés todo o máis alto.

Será unha nova oportunidade para comprobar o considerable aumento da base do atletismo coruñés, onde o tres clubs que se dedican á formación (Marineda Atlético, Coruña Comarca e Riazor Coruña) viron duplicado o número de nenos e nenas que se achegaron ás súas portas na última tempada grazas, en parte, á axuda municipal co programa de carreiras populares Coruña Corre que pon énfases nas categorías de menores e na participación familiar co obxectivo de seguir sumando coruñeses á práctica deportiva e aos hábitos de vida saudables.