O Santiago Futsal xa prepara a visita do FC Barcelona Alusport

O Santiago Futsal comezou esta semana a preparar o partido deste venres onde recibe ao FC Barcelona Alusport ás 21h no Multiusos Fontes do Sar. Os de Santi Valladares chegan a este partido en sexta posición con 26 puntos e recibirán ao FC Barcelona Alusport, que é segundo con 41 puntos, sendo o único equipo invicto en Liga.

Nesta 19ª xornada de liga, santiagueses e culés veranse as caras con obxectivos distintos pero coa mesma intención de sumar tres puntos este venres. O Santiago Futsal quere continuar invicto na súa cancha ante a súa afección e recibe ao Barça, que vén de gañarlle ao actual líder da clasificación, Inter Movistar. Ademais, no partido da primeira volta no Palau, os de Santi Valladares a punto estiveron de dar a sorpresa, tras comezar gañando 0-2 e finalmente empatar 2-2.

Tamén foi un empate o último resultado conseguido entre santiagueses e culés na última visita dos de Marc Carmona ao Multiusos a tempada pasada, aínda que foi o Barça o verdugo do Santiago Futsal na pasada Copa de España de Alcalá, onde se impuxeron por 5-2 nas semifinais.

Este partido será Día do Club, polo que todos os abonados (excepto Infantís) deberán retirar a súa entrada para o partido por só 5€. A entrada xeral é de 15€ e para nenos (menores de 13 anos) é de 2€. Ademais, todos os abonados poderán retirar a maiores até 2 entradas a 10€ cada unha (só en venda anticipada até o venres ás 14h).

Desde o club recomendamos a todos os afeccionados que acudan a retirar a súa entrada durante a semana ás oficinas do club no Multiusos Fontes do Sar en horario de 10h a 14h e de 17h a 20h, para evitar colas o mesmo día do partido en despachos de billetes, que abrirán ás 19,30h.

Plan de traballo da semana

Luns 6 de Xaneiro:
Descanso

Martes 7 de Xaneiro:
9,30h – Multiusos Fontes do Sar –  Preventivo + Táctico

17h – Multiusos Fontes do Sar – Táctico

Mércores 8 de Xaneiro:
17h – Multiusos Fontes do Sar – Forza rápida + Transferencia + Porteiros

Xoves 9 de Xaneiro:

9,30h – Multiusos Fontes do Sar – Táctico

11,30h – Salga de prensa do Multiusos Fontes do Sar – Rolda de prensa de Santi Valladares

Venres 10 de Xaneiro:

21h – Multiusos Fontes do Sar – J19. Santiago Futsal vs FC Barcelona Alusport

Sábado 11 de Xaneiro:

Descanso

Domingo 12 de Xaneiro:

Descanso