O pleno de Teo votará sobre a declaración do 24 de febreiro como Día de Rosalía

A corporación teense reúnese este xoves 30 de xaneiro para celebrar a sesión ordinaria do pleno deste mes. O debate terá lugar, como xa é habitual, en horario de tarde, ás 20:00 horas, para facilitar a asistencia das persoas interesadas e celebrarase no salón de sesións da Casa Consistorial, na Ramallosa. A sesión tamén se retransmitirá por streaming a través da web municipal, premendo no banner En directo, na marxe dereita da portada.

Durante a sesión comparecerá o alcalde de Teo, Martiño Noriega, en referencia ó expediente do Centro Sociocultural Transportable dos Tilos, a petición do grupo socialista. Ademais debateranse varias propostas dos grupos entre as que destacan a moción do BNG de declarar o 24 de febreiro como o día de Rosalía ou a proposta, tamén do Bloque, para garantir o subministro eléctrico ás persoas sen recursos.

A orde do día ten os seguintes puntos:

1. Aprobación das actas das sesións do 28.11.2013 e 23.12.2013.
2. Dar conta das resolucións da alcaldía (da 1053/13 á 1099/13 e da 01/14 á 66/14).
3. Comparecencia diante do pleno do alcalde do Concello de Teo, D. Martiño Noriega Sánchez, en referencia ó expediente do Centro Sociocultural Transportable.
4. Ditame da moción do grupo municipal do BNG para declarar o 24 de febreiro día de Rosalía e realizar actividades que promovan o coñecemento da súa obra e do seu compromiso vital.
5. Ditame da moción do grupo municipal do BNG para declarar Teo vila libre de circos con animais.
6. Ditame da moción do grupo municipal do BNG para garantir o subministro eléctrico ás persoas sen recursos.
7. Ditame da moción do grupo municipal do PP para o aumento da plantilla da policía local.
8. Ditame da moción do grupo municipal do BNG contra a suba nas retribucións das persoas autónomas e pequenas empresas.
9. Mocións.
10. Rogos e preguntas.