O Paulino convértese no equipo gañador do XIX Campionato de Tute Concello de Cervo

O XIX Campionato de Tute Concello de Cervo chegou ao seu remate coa tradicional cea e posterior entrega dos trofeos. Nesta ocasión o equipo gañador foi o do Paulino, que na edición número XVII tamén se fixera co primeiro premio e que conseguiu 113 puntos, a seguido do equipo de Camarote, con 93 puntos. O terceiro clasificado resultou O Trasgo, que acadou 84 puntos. Para todos eles houbo trofeos, así como para a parella con máis puntuación, David e Paulino, do equipo do Paulino.

O alcalde de Cervo, Alfonso Villares, o edil de Deportes, Luis Guillén e o edil José Manuel Balseiro estiveron presentes na cea e participaron na entrega dos trofeos. O responsable de Deportes destacou a longa tradición e o seguimento deste campionato, que nesta edición incrementou o número de equipos que competían, un total de oito: Paulino (113 puntos), Camarote (93), O Trasgo (84), Mesón da Ría (83), Río de Oro (83), Bar Zoco (80), O Castelo (72) e Pedregal (64).

Ao mesmo tempo, Guillén resaltou tamén o “importante papel de dinamización da hostalería local do torneo, xa que cada equipo está vinculado a un establecemento do municipio e é neses locais onde se disputan os diferentes enfrontamentos”. O edil felicitou aos gañadores pero tamén a todos os participantes “por manter vivo durante tantos anos un campionato que convida a decenas de persoas a xuntarse e a compartir o seu tempo de lecer”.