O Partido Socialista expulsará ao militante da Mezquita que asinou a moción de censura
O PSdeG abriu un expediente de expulsión ao militante socialista da Mezquita (Ourense) que subscribiu a moción de censura contra o alcalde do BNG, xunto a independentes. Tanto este militante como os demais asinantes foron no seu día membros do PP, cuxo concelleiro na corporación local non apoia, con todo, o desaloxo do rexedor do Bloque.
En rolda de prensa, a secretaria de Organización do PSdeG, Pilar Cancela, comunicou a apertura deste expediente de expulsión a José Vidueira, unha decisión adoptada “coordinadamente” coa executiva provincial de Ourense, que este mércores solicitou a Ferraz a suspensión de militancia para este concelleiro.