O grupo popular non descarta unha moción de censura no Concello de Ourense

A voceiro do PPdeG, Paula Prado, dixo que non descarta unha moción de censura no Concello de Ourense, coa crise aberta no seo do PSOE local, pero puntualizou que “está todo moi aberto” e “o máis importante é que se manteña a gobernabilidade” na cidade.

Preguntada en rolda de prensa sobre a posibilidade dunha moción, Prado indicou que, “de momento, o partido socialista está a mover as súas fichas”, pero “parece que hai un desgoberno na cidade”. “Os representantes do PP na cidade xa falaron de posibilidades e, dende logo, nós non descartamos…Está todo moi aberto”, respondeu.

A voceiro dos populares atribuíu “á falta de liderado” do secretario xeral do PSdeG, José Ramón Gómez Besteiro, os problemas e movementos do PSOE tanto en Ourense coma en Ferrol, onde o 72% da asemblea de militantes pediu a dimisión da voceiro no Concello, Natividade González Laso.

“Se non hai liderado os mandos intermedios revélanse”, agregou e considerou que “a crise do PSOE en Ourense se levou por diante o liderado do secretario xeral e a pouca credibilidade que lle quedaba para ser alternativa” para presidir a Xunta. “Aquel que non é capaz de meter en cintura a cinco edís díscolos dificilmente poderá enfrontarse a problemas máis importantes como son o paro e a crise”, concluíu.

Pero, agregou, “o problema” para Galicia “non son eses cinco edís”, senón que Besteiro crea que “poñendo de perfil os problemas se resolven sós”, pero o que fan é “encistarse máis”.

Tamén en Ferrol, proseguiu Paula Prado, “a falta de liderado provoca que os mandos intermedios se revelen” porque “entenden, como entende a señora Sestayo, que ninguén lles vai dicir nada tomen as decisións que tomen”.

FERROL

O que fixo a secretaria local do PSOE na cidade, Beatriz Sestayo, é “un atropelo”. “E, falando de atropelos, o que fixo a señora Sestayo comparecendo tras tres meses de silencio non parece razoable”, engadiu, para referirse ás declaracións realizadas este martes pola socialista, que dixo que todo o publicado en relación ao seu incidente cun garda de seguridade do Parlamento é “radicalmente falso”.

Así, Prado considerou que “non parece razoable” que pida a dimisión da voceiro do PSOE en Ferrol “simplemente por non estar de acordo coa súa actuación”, pero “non sexa capaz de dar explicacións sobre unha denuncia tan grave como a dun intento de atropelo”. “Sestayo non está en condicións de pedir a dimisión de ninguén”, resolveu.