O Concello de Verín xa ten listo o Entroido 2014

Dende o 20 de febreiro ao 09 de marzo, as rúas e prazas de Verín acollerán a celebración do Entroido 2014, unha das celebracións máis ancestrais e participativas de Galicia, que foi declarada Festa de Interese Turístico Nacional no ano 2009.

XOVES DE COMPADRES  (20 DE FEBREIRO DE 2014)

Tras a primeira saída dos cigarróns no día de San Antón, comeza o Entroido 2014 co Xoves de Compadres. Tras cear nos restaurantes da localidade, á media noite os homes e mozos inician a celebración desta cita cun percorrido polas rúas Montemaior, avenida de Portugal, Irmáns Moreno, Deputación, Luis Espada, Lisa e praza García Barbón, onde se celebrará o xuízo e queima do Maragato. Durante este percorrido, os compadres irán acompañados do Carro do Meco e da música da Banda de Gaitas do Concello de Verín e da charanga Támega, para acabar a festa na praza cunha Disco-Móvil Jorge.

DOMINGO DE CORREDOIRO  (23 DE FEBREIRO DE 2014)

A partir das 11.30 horas terá lugar a tradicional concentración de cigarróns na praza do Concello para, con posterioridade, recibir aos fregueses á saída das igrexas Parroquial e RR.PP. Mercedarios. Música nas prazas Maior e García Barbón, a cargo da charanga Támega, Disco-Móbil e da orquestra Sintonía de Vigo.

XOVES DE COMADRES (27 DE FEBREIRO DE 2014)

Durante a mañá terá lugar o Desfile Infantil de Entroido, no que os máis pequenos e pequenas do Punto de Atención á Infancia do Concello de Riós, Kero-Kolo do Concello de Verín, Gardería Pinocho, CEIPs Amaro Refojo, Princesa de España, Castrelo do Val, Rodolfo Núñez de Vilardevós, Vendas da Barreira, Medeiros, o Colexio Rural Agrupado Monterrei, Gardaría Pinocho e o Colexio María Inmaculada tomarán as rúas de Verín.  Devandito desfile estará amenizado pola Banda de Gaitas do Concello de Verín e as charangas CBD, Solana, Ideal e Támega. O mesmo partirá, como todos os anos, do entroncamento da Canella Cega coa estrada de Cabreiroá, para percorrer as rúas Deputación, Luis Espada e Lisa, e finalizar nas prazas García Barbón e Maior.

Pola noite, as comadres encherán todos os restaurantes de vila, nos que cearán e bailarán ao ritmo da música das charangas Támega, CBD, Fuego e Ideal. A media noite, no Barrio de San Lázaro, a Raíña do Entroido recibirá a comitiva de Don Carnal, que descenderá polo Camiño Real acompañado da Banda de Gaitas do Concello de Verín e do Folión de Carracedelo. Centenares de mulleres, e moitos homes disfrazados, percorrerán desde San Lázaro até as prazas Maior García Barbón, polas rúas San Lázaro, Luis Espada e Maior, onde o locutor de Cadena 100, Vidal López, caldeará o ambiente. Despois do saúdo da Raíña e Don Carnal, terá lugar a lectura do pregón que dará inicio o Entroido 2014, seguido da actuación da orquestra Marbella, que porá o broche á noite máis “feminina” do Entroido verinense.

VENRES DE COMPADREO (28 DE FEBREIRO DE 2014)

Como nos últimos anos, o Capuchón e a Mascarita serán os uniformes oficiais que portarán os asistentes á festa. A partir das 19 horas terá lugar a saída dos Escuadróns de Capuchóns e Mascaritas para percorrer diversas rúas e prazas da vila, con paradas estratéxicas para mollar a gorxa e encher o bandullo. Irán acompañadas en todo momento de dous Carros do Compadreo e das charangas CBD e Támega, e finalizará o percorrido na praza de Edesio Fuentes coa tradicional queimada para os/as participantes, a cargo dunha meiga e as súas druídas das Sábanas Blancas. Todo amenizado por unha Disco-Móvil Camelot, e a partir de media noite, verbena popular nas prazas García Barbón e Maior co grupo Aché.

SÁBADO DE ENTROIDO  (01 DE MARZO DE 2014)

Ás 17 horas, sairán desde a praza do Concello a comitiva do Cigarrón cara a praza da Mercé pola rúa Laureano Peláez. Na propia praza da Mercé celebrarase un acto solemne, no que se homenaxeará a figura de Francisco Añel ‘O Xastre de Castro’, e onde serán investidos, por primeira vez, varios cigarróns. A continuación, estes novos cigarróns investidos presidirán unha marcha cara a praza do Cigarrón, onde se lle realizará unha homenaxe aos cigarróns que por calquera motivo non poden saír e deleitarnos co son das chocas. Durante a homenaxe  colocarase unha pañoleta na estatua do Cigarrón e unha ofrenda floral que reivindica o sentimento do cigarrón.  A banda sonora será a cargo das charangas Támega e Fuego, que actuarán durante toda a xornada, unha Disco-Móvil Jorge e as actuacións da orquestra Claxxon e o grupo Triunfo.

DOMINGO DE ENTROIDO (02 DE MARZO DE 2014)

Día grande do Entroido. Pola mañá, unha descarga de foguetes despertará a todos os entroideiros, seguida da concentración de carrozas, comparsas, máscaras e cigarróns a medio día no Barrio de San Roque para o gran Desfile de Entroido. A Banda de Gaitas do Concello de Verín e as charangas Solana Fuego, Ideal e Támega serán os encargados de acompañar o desfile, percorrendo as rúas Luis Espada, Alameda e as prazas da Alameda e García Barbón. Na sesión vespertina e nocturna, continuará a animación musical polas rúas da vila a cargo de charangas e; nas prazas Maior e García Barbón, actuarán a orquestra París de Noia e o La Oca.

LUNS FARELEIRO (03 DE MARZO DE 2014)

Animación musical polas rúas de Verín a cargo da charanga Támega. Pola tarde, xogos infantís e inchábeis no Pavillón dos Deportes, onde os máis pequenos, que serán os protagonistas, deben ir disfrazados. Seguindo a tradición, DÍA DA FARELADA, con quilogramos e quilogramos de fariña, nas prazas García Barbón e Maior, e a partir das 19 horas, baile e verbena popular nas prazas García Barbón e Maior coa orquestra Charleston Big-Band e o grupo Alkar.

MARTES DE ENTROIDO (04 DE MARZO DE 2014)

Ás 16.30 horas, concentración de carrozas, comparsas, máscaras e cigarróns no Barrio de San Roque, para media hora máis tarde, dar comezo ao Gran Desfile, que realizará o mesmo percorrido que o domingo. Todo iso amenizado polas charangas Solana, Ideal, Támega e CBD, que actuarán durante o día, o Folión do Tameirón e a Banda de Gaitas do Concello de Verín. A festa continuará, a modo de despedida, e ata que o corpo aguante, nas prazas Maior e García Barbón coa actuación da orquestra Palladium e Garibaldi.