O Concello de Ares colabora na posta en funcionamento da escola deportiva de atletismo “Paula Mayobre”

O Concello de Ares, a través da área de Deportes, colabora, xunto co de Mugardos, na posta en marcha da Escola de Atletismo “Paula Mayobre”, unha iniciativa que nace co obxectivo de dar a coñecer este deporte nas súas diferentes modalidades, ademais de concienciar, asesorar e apoiar a todas as persoas que desexen coñecer o atletismo ou formarse nel dun xeito máis “profesional”. Esta mañá, a propia promotora, a corredora de élite Paula Mayobre, presentaba a escola nunha rolda de prensa na que tamén estiveron presentes o primeiro tenente de alcalde aresán, Eugenio Fernández Lago, e o concelleiro da área, José Juan Vilar, así como os técnicos de Deportes dos municipios de Ares e Mugardos.

Como explicou Mayobre, na escola, que terá como punto de encontro o pavillón municipal aresán, formaranse tres grupos: o de nenos e nenas de 6 a 9 anos -posto que teñen unhas cualidades físicas moi similares-; outro de 10 a 14, e un terceiro grupo de 15 en adiante. En cada un deles, dixo a atleta, levaranse a cabo diferentes actividades e, se ben o obxectivo fundamental vai ser a carreira a pe, tamén se ensinarán modalidades como salto de altura, lonxitude, ou lanzamento de peso e de disco, entre outras.

Os grupos estarán formados por un máximo de quince persoas –aínda que o de adultos podería ser máis numeroso- e un mínimo de cinco ou oito. A actividade desenvolverase os luns e venres, variando os horarios en función de cada grupo e as súas necesidades.

Mayobre informou de que a escola comezará a funcionar o vindeiro mes de febreiro, polo que o prazo de inscripción abre dende mañá mesmo. Así, as persoas interesadas poderán apuntarse no propio pavillón municipal de Ares, no seu horario habitual de apertura, ou no correo electrónico escuelapaulamayobre@gmail.com.

Os prezos son de 18 euros por persoa para os nenos e nenas de ata 14 anos (dúas horas por semana) e de 20 para adultos (tres horas á semana). A corredora engadiu, a este respecto, que as persoas adultas que a maiores deste días desexen un plan de adestramento semanal, con asesoramento individualizado ao longo de toda a semana, pagarán 35 euros.

Dende o Concello de Ares destacaron a importancia desta iniciativa de autoemprego promovido por esta deportista local de élite, ao tempo que puxeron en valor os principios cos que nace a escola, como son o de xuntar a saúde e o deporte nun momento de grande participación, sobre todo por parte de adultos, en carreiras populares e nuns municipios nos que na actualidade – si houbo hai moitos anos- non existía ningunha escola de atletismo. Tamén, engadiron, supón unha aposta polo deporte de base, de grande importancia nas políticas deportivas promovidas polo equipo de goberno local.