O Concello da Coruña asinará un convenio con Novacaixagalicia para colaborar no Programa de Erradicación do Chabolismo

O concelleiro de Servizos Sociais, Miguel Lorenzo, presentou o convenio de colaboración que asinará coa Obra Social da Fundación Novacaixagalicia para continuar este ano co compromiso adquirido polo Concello da Coruña para a integración social das familias, dentro do Programa Municipal de Erradicación do Chabolismo. Este convenio, en anos anteriores, era desenvolvido polo Concello a través da Fundación Secretariado Xitano (FSG), que tamén se encarga doutros proxectos municipais na cidade.

Acompañado do director xerente da Fundación Novacaixagalicia, Pedro Otero, e do presidente da Fundación Secretariado Xitano, Pedro Ponte, o responsable municipal da área de Servizos Sociais quixo agradecer a ambas as entidades a súa predisposición a traballar co Concello nos programas municipais de integración social e laboral.

Coa finalidade de seguir avanzando en todo o proceso iniciado co reacollo de Penamoa, pero ligado tamén aos asentamentos que aínda quedan na cidade -en especial, A Pasaxe- e ás necesidades das familias de etnia xitana do municipio, a Obra Social da Fundación Novacaixagalicia asumirá a testemuña da FSG no Programa de Erradicación do Chabolismo, dentro da aposta municipal pola integración social e, especialmente, no acceso a unha vivenda. Así, o concelleiro de Servizos Sociais avanzou que o Concello asinará un convenio para a titularidade dos pisos de integración e o seguimento integral destas familias.

Nos orzamentos municipais para 2014, a Concellaría de Servizos Sociais dispón de 330.000 euros para a firma deste convenio coa Obra Social da Fundación Novacaixagalicia vinculado ao programa de erradicación do chabolismo. Ademais, o Goberno municipal reserva para este ano outros 32.500 euros para o programa Acceder, que conta, do mesmo xeito que en 2013, con fondos europeos, un programa co que a través da Fundación Secretariado Xitano trabállase na inclusión social e no acceso ao emprego, un plan que serve como paso seguinte no apoio aos procesos de inserción sociolaboral.

Miguel Lorenzo tamén lembrou que, nesta mesma liña de esforzo e compromiso na erradicación do chabolismo, o Concello mantén unha estreita colaboración con outras entidades sociais da cidade, como é o caso de Antonio Noite, coa que está previsto asinar tamén un convenio por valor de 30.000 euros para contribuír aos gastos de financiamento do programa que esta asociación desenvolve de face á integración social das familias que habitan en infravivendas.

O concelleiro de Servizos Sociais destacou o esforzo e a capacidade de traballo de todas as persoas e entidades que desenvolveron e que seguen colaborando nos plans de reacollo das familias residentes en asentamentos da cidade. Miguel Lorenzo puxo como exemplo o proceso de integración que se está desenvolvendo na Pasaxe ou o que levou a cabo en Penamoa, onde o 80% das familias participaron no programa, o que lles permitiu contar cunha oportunidade de aloxamento alternativo nunhas condicións adecuadas.

“A nosa prioridade é que as familias teñan unha oportunidade de vivenda normalizada e digna, fronte á situación de marxinalidade na que se atopaban. Pero unha integración é completa na medida que tamén logramos a inserción laboral das familias”, sinalou Miguel Lorenzo. Por este motivo, en 2012, a Concellaría de Servizos Sociais, coa colaboración da Fundación Secretariado Xitano, puxo en marcha o programa de emprego Acceder,  co obxectivo de desenvolver accións de formación profesional e procura de emprego dirixidas a persoas de etnia xitana. Ademais, en 2013, arrincou o programa de educación Promociona, para fomentar que os nenos terminen con éxito a etapa obrigatoria e obteñan o título de Educación Secundaria Obrigatoria.