O colexio Altamar de Vigo e a Asociación Amigos dos Pazos realizarán unha visita ao Centro de Interpretación das Illas Atlánticas

O Centro de Ensino Público Altamar de Vigo e a Asociación Amigos dos Pazos serán os protagonistas dunha nova visita guiada ao longo desta semana polo Centro de Interpretación e de Visitantes do Parque Nacional das Illas Atlánticas, o Edificio Cambón. Así, preto de 150 persoas pasarán polas instalacións do edificio Cambón para coñecer os valores naturais e patrimoniais dos catro arquipélagos (Cíes, Ons, Sálvora e Cortegada) que conforman o Parque Nacional Marítimo Terrestre.

Os primeiros asistentes desta semana serán 20 membros da Asociación Amigos dos Pazos (martes 21 de xaneiro), 26 alumnos de 6º de primaria do CEIP Altamar (mércores 22), 50 nenos de 2º e 3º de primaria do mesmo centro (xoves 23) e pecharán a rolda de visitas outros 50 alumnos de 4º e 5º de primaria do colexio Altamar, o venres 24 de xaneiro.

Trátase de actividades divulgativas que consisten en visitas guiadas polas distintas salas do centro co fin de coñecer a historia, as paisaxes, a biodiversidade, as especies e ecosistemas máis representativos así coma o significado e valor dos espazos que conforman as illas.

A importancia destas visitas radica no feito de dar a coñecer os valores naturais e patrimoniais dos arquipélagos destacando que calquera centro escolar ou outros colectivos que así o desexen poden participar deste tipo de iniciativas guiadas cubrindo unha solicitude que se atopa na páxina web www.parquenacionalillasatlanticas.com ou poñéndose en contacto co centro.

Dende o inicio destas actividades ata o seu fin pasarán por este centro un total de 378 escolares de educación infantil, primaria e secundaria de 6 centros educativos e unha asociación cultural de Vigo. Compre lembrar que o pasado 17 de xaneiro a delegada territorial da Xunta en Vigo, María José Bravo Bosch, acompañaba ao primeiro grupo e máis numeroso, 80 alumnos e alumnas de 1º da ESO do IES Valadares, que inauguraban esta quenda de visitas.