O Azkar Lugo leva a alegría e a ilusión aos nenos ingresados no HULA

Visita dos xogadores do Azkar Lugo ao HULA

Hoxe sábado 4 de xaneiro é un dos días máis especiais do ano para todos os nenos e nenas. Restan poucas horas para que As Súas Maxestades os Reis Magos de Oriente visiten un ano máis todos os fogares para cumprir os soños dos máis peques da casa. O Azkar Lugo FS, como vén realizando desde fai anos, quixo acordarse de todos aqueles que por uns motivos ou outros se atopan ingresados no HULA e esta mañá realizoulles unha visita para por uns momentos facelos felices.

O máis importante nesta visita ao centro hospitalario lucense foi poder ver o sorriso dos máis pequenos ao ver aos xogadores do Azkar Lugo FS entregándolles uns detalles do club e sobre todo cando estes charlaban con eles e desexábanlles unha pronta recuperación. Os seus familiares amosábanse agradecidos pola visita e esquecían por uns momentos o motivo polo que alí se atopan. O técnico, Diego Ríos, e o preparador físico, Xabi López, xunto cos xogadores Chano, Antonio Diz, Iago Rodríguez e Álex Diz, foron os encargados de realizar esta visita, obsequiarlles cuns agasallos, desexarlles esa melloría e sobre todo desexarlles que nestes días de tanta felicidade todos os seus soños se fagan realidade.