Máis de 40 cativos dan vida á Escola Municipal de Teatro de Tomiño

Ensaio da escola teatral

Descubrir e fomentar recursos expresivos e comunicativos, estimular a fantasía, desenvolver a imaxinación e as capacidades creativas; prepararlles para o xogo dramático espontáneo e libre, vencendo a vergoña e a timidez e motivando o traballo en equipo, cooperativo e solidario, son só algúns dos obxectivos da Escola Municipal de Teatro de Tomiño, á que dan vida 42 nenos, divididos en dous grupos, infantil (4 a 8 anos) e xuvenil (9 a 12).

Por unha banda está o grupo dos pequenos, no que os rapaces se mergullan nunha divertida aventura onde un pirata chamado “Escarapote”, envíalles unha serie de mensaxes, con diferentes probas que teñen que superar. Se o conseguen, ao final do curso, os alumnos conseguirán un tesouro. Así o explica Alba Tamara González, da compañía teatral Migallas, que é tamén a monitora da escola municipal tomiñesa desde hai varios anos.

Nas devanditas probas do pirata, os pequenos van coñecendo a artistas galegos (escultores, escritores, pintores). Este ano están inmersos na vida e obra de Manuel Colmeiro, e a medida que avance o curso, traballarán sobre varios pintores expresionistas. As sesións sempre teñen unha parte plástica, onde os participantes pintan, fan figuras de masa, recortan, pegan….

Por outra banda está o grupo de entre 9 e 12 anos. Neste, os exercicios están máis encamiñados cara á creación da obra de teatro que se realiza a final de curso. Os nenos practican a improvisación, e mediante este método, crean a obra de teatro, é dicir, non estudan ningún guión, senón que traballan a partir dunha idea, danlle forma a unha historia achegando todos unha parte.

Outros dos obxectivos da escola municipal de teatro, son a aprendizaxe activa e gozo do folclore infantil poético (cancións, devanditos, etc.) e dos xogos tradicionais galegos; o coñecemento da propia localidade tomiñesa e da natureza que lles rodea (animais, plantas), así como tamén, a concienciación sobre o coidado da contorna, e o fomento da lectura en galego. Familiarizar aos pequenos coa escoita de contos; favorecer a fluidez na expresión oral e escrita en galego, e fomentar a non discriminación por razón de xénero, figuran tamén entre os fins da institución.

Entre as actividades programadas polo Concello para o pasado Nadal, houbo un taller de teatro bautizado como ”Unha estrela para os Reis Magos”, a cargo de Migallas Teatro, que tivo lugar no Auditorio de Goián, o pasado día 3 de xaneiro. A actividade, dirixida especialmente a nenos de entre 4 e 12 anos, pretendía ser unha pequena mostra de todo o traballo realizado na escola ao longo do curso.

Para os máis pequenos houbo ademais, contos, manualidades, cancións e xogos, e para os maiores, exercicios de teatro, improvisación e expresión corporal. “A idea é compartir ou que facemos día a día na escola con todos vos rapaces e rapazas do Concello, e que pasen unha tarde divertida gozando co teatro”, explicaba a monitora.

Por outra banda estaba o conto; en todas as sesións os nenos escoitaron unha historia relacionada co resto das actividades, e tiveron un apartado de expresión musical, onde aprenderon cancións ou se expresaron corporalmente a través da música.