Máis de 20.000 alumnos de 76 centros da provincia participan no programa ‘Coruña de Aventura’

O concelleiro de Educación, Deportes e Mocidade, Francisco Mourelo, explicou hoxe o contido do novo programa Coruña de Aventura 2014 que inclúe importantes novidades no seu tres modalidades: Rutas Urbanas Animadas, Itinerarios e Visitas Escolares.

“O programa está a contar cunha profunda renovación gradual que continuará o próximo curso para adaptarnos ás novas necesidades e pór ao alcance de centros e alumnos todas as ferramentas dispoñibles”, destacou Mourelo, quen anunciou que o proxecto se suma nesta edición a Smart City.

Itinerarios

“Esta nova iniciativa para este curso supón a ampliación da oferta educativa relacionada co coñecemento da cidade, é dicir, co desenvolvemento da conciencia e expresión cultural dos alumnos do Concello”, explicou o concelleiro, quen engadiu: “Estes itinerarios deséñanse e organizan como unha forma de integrar a cidade na educación cos obxectivos de aprender a valorar e conservar o noso patrimonio histórico – artístico; favorecer o coñecemento da cidade; relacionar diferentes épocas históricas a través da arquitectura urbanística; descubrir lugares que son ou foron de gran importancia para o desenvolvemento da nosa cidade; e xerar actitudes de respecto e valoración cívica cara a manifestacións artísticas da contorna”.

Así, deséñanse diferentes itinerarios adaptados ás distintas etapas educativas, desde os 8 anos (2º ciclo de Primaria) até Bacharelato e os Ciclos Formativos de Grao Superior. Os temas específicos relaciónanse con diferentes épocas históricas da cidade integrando espazos singulares como o Palacio Municipal de María Pita e a súa historia, as rúas medievais da Cidade Vella, a Rúa Real ou as Galerías da Mariña. “En definitiva, percórrense itinerarios realizados a pé que permiten ao alumnado coñecer a cidade, a súa historia e edificios históricos mediante actividades de observación, nas cales os escolares son os responsables de percibir e asimilar o que a cidade lles pode ensinar”, explicou.

O concelleiro de Educación destacou a importancia de que, por primeira vez, deséñense dous itinerarios dentro do proxecto municipal Smart City e dando ademais aos centros a posibilidade de realizalos “antes e despois” na aula, xa sexa organizando previamente o percorrido ou traballando en actividades de consolidación e asimilación dos coñecementos adquiridos unha vez que se realizou a actividade. “Deseñouse unha versión dixital do mesmo percorrido que permite traballalo na aula co obxectivo de facilitar unha ferramenta que permita aos escolares coñecer a cidade a través de contidos dixitais e interactivos”, explicou Mourelo. “Unha sinxela páxina web -continuou-, é o punto de partida onde profesores e alumnos poderán preparar o seu itinerario, á vez que exploran, coñecen e estudan a historia, a arte e as curiosidades dos elementos que máis tarde coñecerán in situ”.

A actividade desenvólvese entre os meses de febreiro e abril cun custo de 1,50 euros por alumno e, como novidade, incorpóranse os seguintes itinerarios:

-3º e 4º Primaria

-De paseo polas rutas medievais.

-Praza de María Pita: unha praza monumental.

-5º e 6º de Primaria

-Prazas con poder: ITINERARIO SMART.

-A Coruña: praza forte.

-1º e 2º de ESO

-Camiño Real.

-Cando A Coruña era Marineda. ITINERARIO SMART.

-3º e 4º de ESO

-Fachada marítima da cidade.

-Casas consistoriais ao longo da historia.

-Bacharelato

-Un camiño de artistas.

Rutas Urbanas Animadas

Percorridos a pé pola cidade deseñados e organizados polo Servizo Municipal de Educación para os escolares de 3 a 8 anos (Infantil e primeiro ciclo de Primaria) e adaptadas tamén para os menores de 2 e 3 anos das Escolas Infantís Municipais (EIM).

“Os obxectivos fundamentais son axudar aos alumnos a espertar e desenvolver as súas competencias sociais e cívicas así como a súa conciencia e expresión cultural ao percorrer lugares emblemáticos da súa cidade”, destacou Mourelo, quen detallou o contido das 5 rutas:

–Un xardín de sensacións. Consiste nun percorrido polos xardíns de Méndez Núñez e a zona do reloxo para os escolares de 2 e 3 anos.

–Praza  de María Pita. Un lugar ideal para contar historias sobre a famosa batalla aos escolares de 4 anos con visita final ao Concello.

–Un museo ao aire libre. Polos Xardíns de Méndez Núñez e a zona de Curros Enríquez para os escolares de 5 anos que permite profundar na arte de observar, escoitar, construír e comparar.

–Tesouros de María Pita. Onde escolares de 7 e 8 anos coñecerán con máis detalle a praza de María Pita e os segredos que esconde unha das zonas máis emblemáticas da cidade.

–Xardín de San Carlos: Memorias dunha batalla. É a novidade desta edición. Ruta para escolares de 1º de Primaria que se vai a levar a cabo no xardín de San Carlos e no Museo Militar.

As rutas, que se realizarán durante os meses de abril e maio, distribúense en dúas sesións diarias. O prazo de inscrición (www.coruna.es) finaliza o 31 de xaneiro. “Seguimos apostando por un programa de éxito e que conta cunha extraordinaria aceptación. O pasado curso participaron 2.986 escolares de 126 grupos de 21 centros educativos do Concello entre CEIPS e EIM”.

Visitas Escolares

Por último, o concelleiro lembrou que se deseñaron e organizado 7 novas Visitas Escolares dirixidas aos alumnos de todas as etapas educativas que se suman ás xa existentes clasificadas en oito grandes ámbitos: culturais, empresas, medios de comunicación, medios de transporte, recursos municipais, recursos naturais, seguridade e policía, sociais. “Trátase dun programa de gran éxito. Este curso recibíronse as solicitudes de 76 centros, 60 da cidade, e 19.816 alumnos”, concluíu Mourelo.