Frades convoca un curso para obter o certificado de transporte de mercadorías ou viaxeiros na UE

O Concello de Frades convoca un curso de formación para a obtención do certificado de aptitude profesional (CAP) do transporte, necesario para o transporte de mercadorías ou de viaxeiros en calquera Estado membro da Unión Europea. Trátase dun curso especialmente dirixido a aqueles condutores que obtiveran o permiso de conducir de camión e/ou tráiler (C1, C, C+E e C1+E) antes do 11 de setembro de 2009 ou o permiso de autobús (D1, D, D1+E e D+E) antes do 11 de setembro de 2008.

O curso ten unha validez de cinco anos e será impartido pola Autoescola COPACO. As clases terán lugar en Frades ao longo de 35 horas, repartidas en dúas fins de semana: 11 e 12 de xaneiro; e 18 e 19 de xaneiro. O custo do curso é de 200 euros máis taxas (21,4 euros). Máis información e inscricións no Concello de Frades ou no teléfono 981 69 55 67.

A necesidade deste CAP do transporte xurde da Directiva 2003/59 do Parlamento Europeo do 15 de xullo de 2003, que establece unha cualificación inicial obrigatoria, independente da formación para a obtención do permiso de conducir, e unha formación continua para manter actualizados os coñecementos dos condutores de vehículos destinados a transporte de mercadorías ou de viaxeiros para cuxa condución se esixan os permisos C1, C1+E, C, C+E, D1 ou D1+E (de aí que o curso teña unha validez de 5 anos).