Depedro fusiona Triana, Chavela Vargas e cumbia colombiana nun Teatro Principal de Santiago entregado

Actuación en Santiago

Jairo Zavala remata moita das súas cancións cun ‘imos’ fervoroso, e este xoves soltou varios no Teatro Principal de Santiago, onde, como Depedro, o seu último proxecto, tocou temas do seu novo disco, ‘La increíble historia de un hombre bueno’.

Non obstante, non foi necesario que Zavala se esforzase en conseguir un teatro case cheo, pois o público estivo entregado dende o primeiro momento. O xoves noite na capital galega deixouse notar entre os asistentes, sumado ao tirón da recente colaboración de Jairo con Santi Balmes (voz de Love of Lesbian) e outras que veñen de máis atrás como a que levou a cabo con Vetusta Morla para o tema ‘Diciembre’, co que, precisamente, rematou os bises xunto a un auditorio que coreó cun marcado ton feminino. O ‘efecto Calexico’, cos que Zavala colabora en directo, atraeu menos espectadores, a xulgar pola media de idade.

Aínda que presenta novos LP e EP (un de colaboracións chamada ‘Casualidades’), o músico madrileño (La Vacazul, Amparanoia) reservou a pasada noite boa parte do recital, dentro do ciclo Íntimo & Acústico, para os seus dous anteriores traballos.

Abriu con ‘Como el viento’, primeira pista do seu primeiro álbum, á que seguiron ‘All the way to the ground’, ‘Hombre bueno’ e ‘Una vez más, de ‘La increíble historia de un hombre bueno’. A continuación tocou ‘Nubes de papel’, que dá nome ao seu segundo cedé. “Esta canción fala de límites, e do necesario e divertido que é acabar con eles”, dixo antes de empezar a pegadiza melodía co inevitable acento mexicano.

“Te sigo soñando’, do disco inaugural de Depedro, e ‘Tu mediodía’, do segundo, foron despois, para dar paso a Triana. E é que en ‘Casualidades’, Depedro, xunto a Los Coronas, versiona o xa clásico ‘En el lago’, do grupo andaluz. “Onte pola tarde ao lago fun coa intención de coñecer algo novo. Reunímonos alí e todo comezou a xurdir como un sono”, cantaban os sevillanos.

A segunda parte do concerto arrancou con ‘You & I’, que Zavala, en lugar de tocar xunto a Bernard Fanning, como fai en ‘Casualidades’, o fixo acompañado do seu guitarra e teclados, Lucas Álvarez de Toledo, quen previamente teloneou a Depedro co seu proxecto persoal, Pez Mago.

México volveu co son istmeño xa para sempre personalizado en Chavela Vargas. E, tras ‘La Llorona’, unha cumbia colombiana: ‘El pescador’, para a que a alma de Depedro contou co bluesman santiagués e “amigo” Adrián Costa. “Xa que estás na cidade, sobe ao escenario”, animoulle Zavala.

Con este ritmo, o público xa en pé, Jairo Zavala solo abandonou o seu lado máis mestizo para o bis. Despediuse ao grande, con ‘¿Que hicisteis?’, ‘Comanche’ e ‘Diciembre’. “¡Imos!”, había xa quen berraba para entón dende o patio de butacas.