Culleredo completa un plan de mellora de beirarrúas nos núcleos urbanos

O peón foi un dos principais obxectivos dos plans municipais de obras acometidos nos últimos meses. O goberno de Culleredo localizou diferentes puntos do municipio con necesidade de incrementar a seguridade viaria para os peóns. O Concello deseñou un amplo plan de arranxo de beirarrúas, centrado nos núcleos urbanos do municipio, que son os que contan con maior número de beirarrúas.

As actuacións, desenvolvidas desde o pasado mes de outubro, complétanse agora co arranxo das beirarrúas na contorna da praza da Sacra Familia, en Vilaboa. No Burgo, o Concello xa finalizou os traballos nas seguintes rúas: avenida de Juan Carlos I, rúas Anxo Senra, Pintor Argüelles, Mosteiro de Carracedo, Ferrocarril, costa dá Lonxa, avenida de Ribados, Visitación da Aciñeira, Gumersindo Pereira e Andrés Pan Vieiro.

En Acea de Ama mellorouse a avenida principal e en Almeiras, a avenida de Almeiras. O proxecto incluíu tamén a reparación daquelas zonas de estacionamento de vehículos que así o requiriron, puntos polos que tamén pasan os veciños a pé. En total, o proxecto, cun orzamento de 24.300 euros, abarcou a reparación de 463,69 metros cadrados de superficie de beirarrúas do municipio e de 310,92 metros cadrados de pavimento de zonas de aparcadoiro.

Os diferentes puntos a mellorar foron localizados polos servizos municipais ou transmitidos polos veciños. Unha das zonas nas que máis incidiu o plan municipal foi A Cros, contorna eminentemente residencial e que alberga moitos equipamentos e zonas comerciais. O equipo de goberno apunta que serve como lugar de residencia a moitas familias con nenos pequenos polo que o Concello quixo pór “o maior dos empeños” en que dispoñan de espazos reservados para peóns “nas mellores condicións”.

Senda na Corveira, beirarrúas en Vilaboa e varanda no Burgo As actuacións destinadas a incrementar a seguridade viaria dos peóns foron unha constante en Culleredo nos últimos meses. Na Corveira, o Concello creou unha senda peonil en madeira para conectar a zona antiga do núcleo coa nova, onde se concentran a maior parte dos servizos. En Vilaboa, o goberno municipal construíu beirarrúas na rúa Xafontes, que permite enlazar con núcleos como Conduzo. No Burgo, reformouse do firme das rúas peonís Hersa e Sanjurjo de Carricarte, con deterioracións nas lousas, producidos polo paso do tempo e pola entrada de vehículos de peso.

No paseo marítimo, o Concello arranxou a ponte de madeira da lagoa de Fonteculler. E na avenida de Ribados colocou unha varanda en paralelo xunto ao río Trabe para protexer aos viandantes.