Comezan as declaracións de imputados da Coruña

A xuíza instrutora da ‘Operación Pokémon’, Pilar de Lara, comezou este venres a tomar declaracións aos doce imputados na peza separada da Coruña que investiga supostas contratacións irregulares a favor do grupo empresarial Vendex.

Sobre as 15.15 horas abandonou os xulgados de Lugo o técnico da Casa dos Peixes Manuel M., que saíu da sede xudicial tras comezar a declarar sobre as 11.30 horas e declinou facer declaracións.

Para esta xornada tamén estaban previstas as declaracións do director técnico da Casa dos Peixes, Francisco Franco do Amo, e da directora dos Museos Científicos Coruñeses, Mónica Igrexas.

Na denominada fase ‘Pikachu’ foron imputadas 12 persoas, entre concelleiras e técnicos municipais do Concello da Coruña. Entre eles, está o primeiro tenente de alcalde, Julio Flores (PP), e o concelleiro socialista José Nogueira.

Ademais do primeiro tenente de alcalde e portavoz do goberno municipal da Coruña, Julio Flores, figuran como imputados un asesor seu e o actual concelleiro socialista e exresponsable das áreas de Contratación e de Tráfico durante os mandatos socialistas, José Nogueira.

Entre outros, figuran tamén unha asesora da Concellaría de Cultura; a xefa de Contratación, dúas traballadoras do Instituto Municipal Coruña Espectáculos (IMCE), entre elas a súa administradora, e o exjefe de asuntos económicos da área de Deportes.

UN CENTENAR DE IMPUTADOS

Coas novas imputacións na Coruña, a ‘Operación Pokémon’ xa chega ao centenar de implicados nesta instrución xudicial que investiga unha suposta trama de subornos de empresas a políticos para obter concesións de servizos públicos e renovalas ao longo dos anos.

No epicentro sitúanse as empresas do grupo Vendex, aínda que tamén a concesionaria do servizo de augas Aquagest centra ramas desta investigación, entre outras empresas.

Desde que a operación estalou o 20 de setembro de 2012 coa detención dos entón alcaldes de Ourense, Francisco Rodríguez (PSdeG); e de Boqueixón, Adolfo Gacio (PPdeG); e do expresidente da Confederación Hidrográfica Miño-Sil Francisco Fernández Liñares, a ‘Operación Pokémon’ salpicou a outros gobernos locais das cidades máis importantes como os de Lugo e Santiago, onde os seus propios alcaldes están imputados.

Á parte dos políticos e técnicos sinalados nestes concellos, tamén foi imputado o alcalde do Carballiño (Ourense) e solicitouse información da concesión de servizos públicos noutros múltiples consistorios como os de Ortigueira, Marín, Ponte Caldelas, Cospeito ou Arzúa, entre outros.

Dentro da propia macroinvestigación do caso ‘Pokémon’, que permanece baixo segredo de sumario desde fai máis dun ano, hanse subdividido algunhas operacións como a ‘Manga’, que se centrou en Santiago e na que acabou imputado o exalcalde Gerardo Conde Roia, ou a ‘Pikachu’, coa que agora foi bautizada a rama que investiga as concesións na Coruña.