Cangas renova as patentes de “O Facho” e “Berobreo”

O concello de Cangas ven de renovar, ante a Oficina Española de Patentes e Marcas (OEPM) a patente de marca de “O Facho” e “Berobreo” como marcas multiclase.

A renovación destas patentes é de especial importancia posto que permite o mantemento en vigor destes signos e contribúe a conservar o dereito exclusivo e excluínte do uso dos mesmos fronte a signos similares ou fraudulentos de terceiros. 

O monte de O Facho representa un dos principais atractivos turísticos do concello de Cangas. Nel consérvanse restos dun dos santuarios romanos máis importantes da Península Ibérica ao cal acudían para render culto ao deus Berobreo. Dende a súa cima pódense ver as illas Cíes e as illas de Ons e Onza así como a entrada das rías de Vigo e Pontevedra.