As deputacións de León e Ourense colaboran na creación dun proxecto de turismo sostible

As deputacións de Ourense e León colaboran nun proxecto que ten como obxectivo poñer en valor o turismo sostible, potenciar o emprego xuvenil e favorecer a creación de “empresas verdes”, vencelladas co medio ambiente, o co turismo accesible, ecolóxico e sostible. O proxecto, denominado “Empleaverde” está financiado polo Fondo Social Europea a través da Fundación Biodiversidade, coa colaboración das deputacións de Ourense e León.

Así se detalla no compromiso que o presidente da Deputación de Ourense, Manuel Baltar, en calidade de presidente do Inorde, asinou para o desenvolvemento deste proxecto, cuxa finalidade é a realización de actividades para a profesionalización e creación de emprego no ámbito do turismo sostible e de natureza.

O programa “Empleaverde” consta de seminarios estudos, actividades de formación e publicacións, que conforman un plan estratéxico en favor do desenvolvemento turístico sostible en espazos protexidos das provincias de Ourense e León. Esta colaboración entre ámbalas dúas administracións públicas permitirá levar a cabo en Ourense dous seminarios: un sobre a Carta europea de turismo sostible e outro sobre Gastronomía, para debater sobre produtos autóctonos e de tempada (castaña, pataca, setas e horta) e turismo gastronómico.

Tamén se realizarán estudos sobre o Camiño Mozárabe, Vía da Prata, eixo vertebrador e dinamizador do turismo, e sobre a Vía Nova –Vía XVIII de Antonio-, que une Ourense e León.

En canto á formación, o programa inclúe as seguintes accións formativas: Como crear valor engadido para os produtos autóctonos, transformación e gastronomía; Espazos protexidos e aproveitamento e posta no mercado de produtos turísticos sostibles, e unha acción formativa sobre a Carta europea de turismo sostible. Finalmente, dentro do marco do programa, elaborarase como publicación unha guía de boas prácticas en espazos protexidos (reservas da Biosfera, parques nacionais, LINCS, Zepas, etc.).