Abel Caballero asegura que Vigo “ten os servizos municipais máis baratos de Galicia”

O alcalde de Vigo, Abel Caballero, proclamou este luns que a cidade olívica “ten os servizos municipais máis baratos de Galicia”, en comparación coas outras grandes cidades, e presumiu de que os vigueses pagaron en 2013 dez millóns de euros menos que os coruñeses por eses servizos, “segundo os datos do propio Ministerio de Facenda”.

Nunha rolda de prensa, o rexedor lembrou que Vigo, “a cidade de réxime común menos endebedada de España”, é a que ten “a auga máis barata, a recollida de lixo máis barato ou o billete de bus máis barato” de Galicia.

Segundo repasou Caballero ante os medios, os vigueses pagaban 41 millóns de euros polos servizos do Concello en 2010, fronte á mesma cantidade que se pagaba na Coruña, a pesar de ter “60.000 habitantes menos”. Do mesmo xeito, esa cantidade foi de 45 millóns en 2011, de 41 millóns en 2012 e de 39 millóns en 2013; mentres que, na Coruña, o custo para os cidadáns foi de 49 millóns en 2011, de 52 millóns en 2012 e de 49 millóns en 2013.

Así, os vigueses pagaron unha media de 132 euros polos servizos municipais durante o pasado ano, mentres que os coruñeses, segundo insistiu o alcalde, pagaron 202 euros, “un 53 por cento máis”. A este respecto, Caballero reiterou que a cidade olívica ten a “menor presión fiscal” das cidades galegas.