A Xunta asesorará na elaboración dos plans de negocio a 40 emprendedores de Ferrol

Arredor de corenta emprendedores das comarcas de Ferrolterra terán oportunidade de contar co apoio do Igape para desenvolver e avaliar os seus respectivos plans de negocio, no marco do seminario específico que se vai desenvolver na cidade, a partir do próximo día 12 de febreiro, no centro de emprego do Concello de Ferrol.

Este seminario para emprendedores forma parte do novo impulso que está a dar a Consellería de Economía e Industria ao emprendemento, no marco da posta en marcha da Lei do Emprendemento e da activación da Unidade Galicia Emprende. De feito, nos pasados meses de novembro e decembro un cento de emprendedores tiveron oportunidade de elaborar e avaliar os seus proxectos nos seminarios que se desenvolveron en Pontevedra, Ourense e Lugo. Ademais do seminario de Ferrol, no próximo mes de febreiro está previsto que comecen encontros formativos semellantes na Mariña (Cervo) e en Vigo.

Todas estas sesións formativas teñen como obxectivo facilitar aos emprendedores participantes habilidades e ferramentas sinxelas e útiles para elaborar os plans de negocio das súas empresas e determinar, co apoio de titores expertos, a viabilidade dos seus proxectos. En todos os casos, o programa a desenvolver inclúe tres sesións formativas e dúas de titoría personalizada. O número de proxectos para este seminario é de 20, podendo participar un máximo de dous emprendedores por proxecto.

Os seminarios van destinados tanto a persoas con clara vocación emprendedora, e que teñan un proxecto de negocio que desexen analizar contando con asesoramento especializado, como a empresarios ou autónomos con menos de 42 meses de actividade que desexen avaliar, reorientar ou consolidar a súa empresa. Os interesados poden inscribirse, no apartado de xornadas da web do Igape, ata a cobertura de prazas.

Os seminarios inclúen formación xenérica sobre diferentes modelos de negocio, fiscalidade, tramites de constitución e fontes de financiamento. O programa achega, igualmente, formación específica sobre a elaboración dos plans de negocio e o plan económico e financeiro, e sesións personalizadas nas que os promotores reflexionan, co apoio de titores expertos, sobre a viabilidade do plan de negocio elaborado.